ຈີນເສັຍຄະດີໃຫ້ກັບສະຫະພາບເອີຣົບ ໃນປະເດັນສະຖານະຂອງຈີນບໍ່ໄດ້ເປັນ "ລັດເສດຖະກິດຕະຫຼາດ" ໃນອົງການການຄ້ານໂລກ

ເລື່ອງນີ້ຕ້ອງໄດ້ຍ້ອນກັບຄຶນໄປໃນປີ 2016 ຫຼື ຕອນທີ່ອົງການການຄ້າໂລກ (WTO) ຄົບຮອບ 15 ປີ, ແຕ່ໃນເວລານັ້ນສະຫະພາບເອີຣົບ ຫຼື ອີຢູ (EU) ບໍ່ຍອມຮັບໃນສະຖານະຂອງຈີນເທື່ອ (ສະຖານະທີ່ຍັງບໍ່ເປັນລັດເສດຖະກິດຕະຫຼາດ ຫຼື Market Economy). ສະນັ້ນ, ອີຢູຈຶ່ງໄດ້ຄົງຫຼາຍມາດຕະການໄວ້ເພື່ອສະກັດກັ້ນການຄ້າຈາກຈີນ. ເພາະວ່າອີຢູເຫັນວ່າຈີນຍັງເປັນປະເທດທີ່ລັດຖະບານໃຫ້ການສະໜັບສະໜູນເອກກະຊົນຢ່າງແຂງແຮງ (ກົດແມ່ນຫ້າມໃຫ້ພາກລັດເຂົ້າໄປໃຫ້ເງິນສະໜັບສະໝູນ ຫຼື ແຊກແຊງບັນດາບໍລິສັດທີ່ເປັນເອກກະຊົນ) ຈຶ່ງສົ່ງຜົນໃຫ້ສີນຄ້າຂອງຈີນມີລາຄາຖືກກ່ວາຕົ້ນທຶນທີ່ແທ້ຈິງ.

ຍ້ອນສາຍເຫດນີ້, ອີຢູ່ຈຶ່ງຄິດວ່າມັນເປັນຄວາມສ່ຽງທີ່ຈະເຮັດໃຫ້ສິນຄ້າຈີນບໍ່ມີສິ່ງກິດຂວາງດ້ານພາສີ ແລະ ສົ່ງຜົນກະທົບຕໍ່ຕະຫຼາດການຄ້າພາຍໃນຂອງອີຢູ. ມັນເປັນໄປໄດ້ວ່າລັດຖະບານຈີນຈະຊ່ວຍບໍລິສັດເອກະຊົນຂອງຈີນຕີຕະຫຼາດເອີຣົບໂດຍການຖົມຂຸມຕະຫຼາດ (ຄວາມໝາຍກໍ່ຄືຂາຍສິນຄ້າໃນລາຄາຖືກກວ່າລາຄາຕົ້ນທຶນແລ້ວກັບໄປເອົາເງິນຊົດເຊີຍສ່ວນຕ່າງກັບລັດຖະບານຈີນຄືນ. ຕົວຢ່າງ: ສິນຄ້າມີຕົ້ນທຶນບວກກໍາໄລແລ້ວຢູ່ທີ່ 10 ໂດລາ/ອັນ, ບໍລິສັດຈະຂາຍພຽງແຕ່ 8-9ໂດລາ/ອັນ, ສ່ວນຕ່າງ 1-2 ໂດລາ/ອັນ, ບໍລິສັດຈະກັບໄປເອົາສ່ວນຕ່າງນີ້ກັບລັດຖະບານຈີນຄືນ. ຈຸດປະສົງການເຮັດແບບນີ້ກໍ່ເພື່ອຈະເຮັດໃຫ້ສິນຄ້າຈີນມີລາຄາທີ່ຕໍ່າ). ການເຮັດການຄ້າແບບຖົມຂຸມຕະຫຼາດນີ້ຈະເຮັດໃຫ້ສິນຄ້າທີ່ຜະລິດຢູ່ໃນອີຢູເສຍໃຫ້ກັບສິນຄ້າຂອງຈີນ ແລະ ຕະຫຼາດການຄ້າທັງໝົດຈະຖືກສີນຄ້າຂອງຈີນຍຶດຄອງ ເຊິ່ງບາດກ້າວຕໍ່ໄປກໍ່ຄືການທີ່ຈີນຈະເຂົ້າໄປຊື້ ແລະ ຄວາມຄຸມກິດຈະການຕ່າງໆຂອງເອີຣົບ.

ຍ້ອນເຫດຜົນຂ້າງເທິງນີ້ເຮັດໃຫ້ອີຢູຕັດສິນໃຈອອກມາດຕະການທາງດ້ານການຄ້າຫຼາຍຢ່າງ ໂດຍສະເພາະແມ່ນກຳແພງພາສີ ເພື່ອປ້ອງກັນບໍ່ໃຫ້ສີນຄ້າຂອງຈີນມີລາຄາຖືກຈົນເຮັດໃຫ້ສີນຄ້າພາຍໃນອີຢູບໍ່ສາມາດແຂ່ງຂັນໄດ້. ດັ່ງນັ້ນ, ອີຢູຈຶ່ງໄດ້ໃຊ້ເຫດຜົນນີ້ເປັນຂໍ້ອ້າງທີ່ສຳຄັນວ່າ ຈີນບໍ່ແມ່ນປະເທດທີ່ມີສະຖານະເປັນ "ລັດເສດຖະກິດຕະຫຼາດ".

ເຖິງຢ່າງໃດກໍ່ຕາມ, ຈີນເຫັນວ່າເຫດຜົນນີ້ເປັນສິ່ງທີ່ບໍ່ສົມເຫດສົມຜົນ ແລະ ເປັນການກິດກັນທາງການຄ້າຈາກອີຢູ. ເຊິ່ງຂັດກັບຫຼັກການຂອງການຄ້າເສລີ ແລະ ຈີນເຫັນວ່າການທີ່ຈີນໄດ້ເຂົ້າເປັນສະມາຊີກຂອງອົງການການຄ້າໂລກນັ້ນກໍ່ໝາຍຄວາມວ່າໄດ້ຍອມຮັບສະຖານະຂອງຈີນໃນການເປັນລັດເສດຖະກິດຕະຫຼາດແລ້ວ.

ດັ່ງນັ້ນ, ໃນປີ 2016, ຈີນຈຶ່ງໄດ້ຟ້ອງຮ້ອງອີຢູຕໍ່ອົງການການຄ້າໂລກ ກ່ຽວກັບ ເລື່ອງການກິດກັນທາງການຄ້າ ເພື່ອໃຫ້ອີຢູຍອມຮັບສະຖານະຂອງຈີນເປັນລັດເສດຖະກິດຕະຫຼາດທີ່ທັນສະໄໝ ແລະ ຍົກເລີກມາດຕະການເກັບພາສີທີ່ຍັງມີຜົນບັງຄັບໃຊ້ຕໍ່ສີນຄ້າຈີນຢູ່.

ຈີນໄດ້ໃຊ້ເວລາກວ່າ 4 ປີໃນການຕໍ່ສູ້ຂະດີພິພາດນີ້ກັບສະຫະພາບເອີຣົບ. ຈົນຕົກມາຮອດໄລຍະກາງເດືອນມິຖຸນາ 2020 ນີ້, ຜົນການຕັດສິນຂໍພິພາດໂດຍອົງການການຄ້າໂລກ ໄດ້ລົງມະຕິໃຫ້ຈີນເປັນຝ່າຍເສຍຄະດີໃຫ້ແກ່ສະຫະພາບເອີຣົບ. ຜົນຂອງການການຕັດສິນດັ່ງກ່າວຈະເຮັດໃຫ້ຈີນປະເຊີນກັບມາດຕະການກິດກັນທາງການຄ້າທີ່ເຂັ້ມງວດກວ່າເກົ່າຈາກສະຫະພາບເອີຣົບ. ເນື່ອງຈາກວ່າ, ສະຫະພາບເອີຣົບຈະໃຊ້ຜົນຂອງການຕັດສີນດັ່ງກ່າວເປັນຂໍ້ອ້າງໃນການອອກມາດຕະການກິດກັນທາງການຄ້າກັບຈີນໄດ້ຢ່າງເຕັ່ມທີ່ນັ້ນເອງ. ນອກຈາກນີ້, ຜົນການຕັດສີນຍັງຈະສົ່ງຜົນກະທົບຕໍ່ຈີນໃນລັກສະນະຄະດີທີ່ໃກ້ຄຽງກັນທີ່ຈີນໄດ້ມີບັນຫາຂັດແຍງກັບປະເທດອື່ນອີກດ້ວຍ ແລະ ໜຶ່ງໃນນັ້ນກໍ່ຄືບັນຫາການຄັດແຍ່ງລະຫວ່າງຈີນ ກັບ ສະຫະລັດ (ຮາຮາ ມີຊື່ເມກາມາກ່ຽວຈົນໄດ້).

ສະຫລຸບແລ້ວ, ຈີນຕ້ອງສືບຕໍ່ປະເຊີນກັບມາດຕະການທາງດ້ານພາສີ ສີນຄ້ານຳເຂົ້າຈາກສະຫະພາບເອີຣົບຕໍ່ໄປ ເພື່ອປ້ອງກັນບໍ່ໃຫ້ສິນຄ້າຂອງຈີນມີລາຄາຖືກກ່ວາລາຄາຕົວຈິງ ແລະ ອາດຈະຕ້ອງປະເຊີນກັບມາດຕະການທີ່ເຂັ້ມງວດຂຶ້ນກວ່າເກົ່າໃນອະນາຄົດ.

----------------------------------------

👉 ທ່ານສາມາດອ່ານຂໍ້ຂ່າວອື່ນໆໄດ້ຢູ່ດ້ານລຸ່ມ 👇

👉 ຢ່າລືມ ກົດໄລຄ໌ Like 👍, ກົດຕິດຕາມ See first 🌟 ເພື່ອບໍ່ພາດໃນການຕິດຕາມຂ່າວສານດີໆ, ໜ້າສົນໃຈ ແລະ ເປັນກຳລັງໃຈໃຫ້ພວກເຮົາດ້ວຍ. 🇫 Nep2020