ຄວາມສໍາພັນ ຈີນ-ອົດສະຕາລີ ກຳລັງຕົກຕໍ່າລົງເລື້ອຍໆ

ຄວາມສໍາພັນລະຫວ່າງ ຈີນ-ອົດສະຕາລີ ນັ້ນມີບັນຫາມາໄດ້ຈັກໄລຍະໜຶ່ງແລ້ວ ຕັ້ງແຕ່ລະດັບປະຊາຊົນໄປຈົນເຖີງລະດັບລັດຖະບານ. ຖ້າທ່ານໃດໄດ້ຕິດຕາມຂ່າວສານການເມືອງລະຫວ່າງປະເທດ ໜ້າຈະພໍຮູ້ວ່າຊ້ວງ 2-3 ປີມານີ້ມັກຈະມີຂ່າວກຽວກັບນັກສຶກສາຈີນທີ່ຮຽນຢູ່ອົດສະຕາລີ ຕີກັນກັບນັກສຶກສາຮ່ອງກົງ ແລະ ນັກສືກສາອົດສະຕາລີ ຢູ່ຕະຫຼອດ. ຫຼ້າສຸດຕອນ 2 ເດືອນກ່ອນ ກໍ່ໄດ້ມີຄຣີບວີດີໂອທີ່ນັກສຶກສາຈີນຕີກັນກັບນັກສືກສາອົດສະຕາລີທີ່ຈັບປ້າຍປະທ້ວງລັດຖະບານຈີນ.

ເຊັ່ນດຽວກັນ, ລະດັບລັດຖະບານອົດສະຕາລິກໍ່ມີຄວາມກັງວົນ ແລະ ຢ້ານອິດທິພົນຂອງລັດຖະບານຈີນຂ້ອນຂ້າງສູງ. ຕັ້ງແຕ່ເລື່ອງຄວາມໝັ້ນຄົງທີ່ອົດສະຕາລີຫາວ່າຈີນພະຍາຍາມສົ່ງສາຍລັບເຂົ້າມາໃນອົດສະຕາລີ ເພື່ອລັກຂໍ້ມູນ ແລະ ພະຍາຍາມປຸກລະດົມການປັ່ນປ່ວນສັງຄົມອົດສະຕາລິໃຫ້ເກີດຄວາມວຸ້ນວາຍ.

ປີກາຍນີ້ກໍ່ມີເລື່ອງສະຖາບັນຂົງຈື້ຂອງຈີນ ເຊິ່ງດໍາເນີນການຢູ່ມະຫາວິທະຍາໄລຫຼາຍໆແຫ່ງທົ່ວໂລກພະຍາມຍອມທີ່ຈະແຊກແຊງເສລີພາບທາງວິຊາການພາຍໃນມະຫາວິທະຍາໄລຂອງອົດສະຕາລີຈົນເຮັດໃຫ້ເກີດກະແສຮຽກຮ້ອງກັນຂະໜາດໃຫຍ່ໃຫ້ປິດສະຖາບັນທີ່ຮັບໃຊ້ລັດຖະບານຈີນໄປໃຫ້ໝົດໃນອົດສະຕາລີ (ຝ່າຍອົດສະຕາລີກ່າວຫາວ່າເປັນແບບນີ້).

ຫຼ້າສຸດກໍ່ເລື່ອງທາງການເມືອງພາຍໃນຂອງຮ່ອງກົງນີ້ລະທີ່ເຮັດໃຫ້ຄວາມສໍາພັນ ແລະ ການຕິດຕໍ່ພົວພັນລະຫວ່າງກັນຂອງສອງຊາດເກີດມີຄວາມເຄັ່ງຕຶງຂຶ້ນມາຢ່າງດຸດເດືອດຫຼາຍຂຶ້ນ ເພາະວ່າອົດສະຕາລີເປັນພັນທະມິດຂອງອັງກິດ ແລະ ອາເມລິກາ ທີ່ບໍ່ເຫັນດີກັບລັດຖະບານຈີນໃນເລື່ອງຮ່ອງກົງ ທີ່ກ່າວຫາວ່າຈີນພະຍາຍາມທຳລາຍເສລີພາບ ແລະ ປະຊາທິປະໄຕພາຍໃນຮ່ອງກົງ, ບໍ່ເຄົາລົບຕໍ່ຫຼັກການ 1 ປະເທດ 2 ລະບົບ ທີ່ຈີນເຄີຍສັນຍາໄວ້ກັບອັງກິດ ສະໄໝສົ່ງມອບຮ່ອງກົງຕອນ 20 ກວ່າປີທີ່ແລ້ວ. ເຮັດໃຫ້ອົດສະຕາລີນັ້ນປະກາດໂຈະຂໍ້ຕົກລົງການສົ່ງຄົນຮ້າຍຂ້າມແດນທີ່ເຄີຍເຮັດໄວ້ຮ່ວມກັບຮ່ອງກົງ ແລະ ຈີນ ເພື່ອເປັນການໂຕ້ຕອບລັດຖະບານຈີນ.

ການປະກາດໂຈະຂໍ້ຕົກລົງສົ່ງຄົນຮ້າຍຂ້າມແດນນີ້ ເປັນວິທີໜຶ່ງທີ່ລັດຖະບານອົດສະຕາລີພະຍາຍາມງັດຂຶ້ນມາໃຊ້ ເພື່ອປົກປ້ອງ, ຮັກສາສິດ ແບະ ເສລີພາບ, ຄວາມປອດໄພຂອງຄົນຮ່ອງກົງທີ່ຂ້າມນໍ້າ, ຂ້າມທະເລມາອາໃສຢູ່ໃນອົດສະຕາລີ. ຈາກສະຖິຕີຫຼ້າສຸດພົບວ່າ ມີຄົນຮ່ອງກົງອາໃສຢູ່ໃນອົດສະຕາລີທັງໝົດກວ່າ 1 ແສນຄົນ ທັງແບບຖາວອນ ແລະ ແບບວີຊາເຮັດວຽກ ແລະ ວີຊາທຸລະກິດຊະນິດອື່ນໆ.

ໃນໂອກາດນີ້ລັດຖະບານອົດສະຕາລີ ຈຶ່ງປະກາດນະໂຍບາຍໃຫມ່ ເພື່ອຢົ້ວຢຸລັດຖະບານຈີນ ໂດຍການອະນຸຍາດ ແລະ ເຊີນຊວນຄົນຮ່ອງກົງອົບພະຍົກ ແລະ ຍ້າຍຖີ່ນຖານ ໃຫ້ມາຢູ່ອົດສະຕາລີ, ບໍ່ວ່າຈະມາເຮັດວຽກ, ມາຮຽນໜັງສື ຫຼື ມາຕັ້ງຖີ່ນຖານຢູ່ເລີຍກໍ່ຈະຍີນດີຕ້ອນຮັບ.

ສໍາລັບມາດຕະການໃນເບື້ອງຕົ້ນນັ້ນ ທາງອົດສະຕາລີຈະອະນຸມັດໃຫ້ຄົນຮ່ອງກົງທີ່ຖືວີຊາຊົ່ວຄາວໃນອົດສະຕາລີໄດ້ຮັບອະນຸຍາດໃຫ້ຖືວີຊາອາຍຸ 5 ປີ ແລະ ເປີດຊ່ອງທາງໃຫ້ຄົນຮ່ອງກົງທີ່ມາຢູ່ໃນອົດສະຕາລີຈົນຄົບ 5 ປີເຫຼົ່ານີ້ສາມາດຍື່ນເລື່ອງຂໍຮັບສິດທິພິເສດເປັນພົນລະເມືອງຖາວອນໄດ້ເລີຍ.

ໃນຖານະທີ່ອົດສະຕາລີກໍ່ກຳລັງຂາດແຄນແຮງງານມີທັກສະ, ຂາດແຄນມັນສະໝອງ ແລະ ຂາດແຄນປະຊາກອນທີ່ເອົາໄວ້ມາຂັບເຄື່ອນເສດຖະກິດຢູ່ແລ້ວ ທາງອົດສະຕາລີຈຶ່ງຍີນດີເປັນຢ່າງຍິ່ງຫາກມີມອບຮ່ອງກົງ ຫຼື ຜູ້ຮັກປະຊາທີປະໄຕຂອງຮ່ອງກົງຈະລີ້ໄພມາຢູ່ອົດສະຕາລີ. ຖືເປັນຂໍ້ສະເໜີ ແລະ ມາດຕະການທີ່ໄດ້ຮັບຜົນປະໂຫຍດທັງສອງຝ່າຍ. ຄົນຮ່ອງກົງກໍ່ຈະໄດ້ໂອກາດໃນການເລີ່ມຕົ້ນຊີວິດໃໝ່ຫ່າງໄກຈາກລັດຖະບານຈີນ, ບໍ່ຕ້ອງຢ້ານວ່າຈະຖືກລັດຖະບານຈີນສົ່ງຄົນມານໍາຄຸກຄາມ. ສ່ວນອົດສະຕາລີກໍຈະໄດ້ປະຊາກອນທີ່ມີຄຸນນະພາບຈາກຮ່ອງກົງມາຊ່ວຍກັນພັດທະນາປະເທດຊາດອີກດ້ວນ.

ແຕ່ຢ່າໃດກໍ່ຕາມ, ເຖີງວ່າການເມືອງລະຫວ່າງ ຈີນ ແລະ ອົດສະຕາລີ ຂ້ອນຂ້າງທີ່ຈະເພີ່ມທະວີຄວາມຮຸນແຮງຂຶ້ນ. ແຕ່ໃນອີກມິຕິທາງດ້ານເສດຖະກິດນັ້ນ, ອົດສະຕາລີຍັງຕ້ອງເພິ່ງພາອາໃສຈີນໃນທາງການຄ້າຢູ່ຢ່າງຫຼວງຫຼາຍ ເຊິ່ງມູນຄ່າທາງການຄ້າທີ່ອົດສະຕາລີມີຕໍ່ຈີນນັ້ນເປັນຫຼັກແສນລ້ານໂດລາ ໃນປີ 2019. ດັ່ງນັ້ນ, ເຖີງແມ່ນວ່າດ້ານການເມືອງ ອົດສະຕາລີຈະເບິ່ງຄືເຂັ້ມແຂງຕໍ່ຈີນກໍ່ຕາມ, ແຕ່ຖ້າຈີນຍົກເອົາເລື່ອງເສດຖະກິດການຄ້າມາໂຕ້ກັບ ອົດສະຕາລີກໍ່ອາດຈະເກີດບັນຫາໄດ້ໃນອານາຄົດ.

----------------------------------------

👉 ທ່ານສາມາດອ່ານຂໍ້ຂ່າວອື່ນໆໄດ້ຢູ່ດ້ານລຸ່ມ 👇

👉 ຢ່າລືມ ກົດໄລຄ໌ Like 👍, ກົດຕິດຕາມ See first 🌟 ເພື່ອບໍ່ພາດໃນການຕິດຕາມຂ່າວສານດີໆ, ໜ້າສົນໃຈ ແລະ ເປັນກຳລັງໃຈໃຫ້ພວກເຮົາດ້ວຍ. 🇫 Nep2020