ເທື່ອທຳອິດຂອງໂລກ! ມະຫາວິທະຍາໄລຍີ່ປຸ່ນໃຫ້ປະລິນຍາໂທແກ່ນັກຮຽນທີ່ຈົບສາຂາວິຊານິນຈາ (Ninja)

ຖືວ່າເປັນຄັ້ງທຳອິດທີ່ມະຫາວິທະຍາໄລແຫ່ງໜຶ່ງໃນປະເທດຍີ່ປຸ່ນໄດ້ມອບໃບປະກາດລະດັບປະລິນຍາໂທໃຫ້ແກ່ນັກສຶກສາທີ່ຈົບການສຶກສາໃນສາຂາວິຊານິນຈາ ເຊິ່ງເປັນຄົນທຳອິດໃນປະເທດຍີ່ປຸ່ນ ແລະ ໃນໂລກ. ທ່າວ ຈີນີຊິ ມິດຊູຫາຊິ (Genichi Mitsuhashi), ອາຍຸ 45 ປີໃຊ້ເວລາ 2 ປີ ເພື່ອສຶກສາ ແລະ ຝຶກທັກສະດ້ານທັກສະດ້ານສິລະປະ ແລະ ສະຕາຍການຕໍ່ສູ້ໃນແບບນິນຈາທີ່ມະຫາວິທະຍາໄລມິເອະ (Mie University)

ທ່າວ ມິດຊູຫາຊິ ກ່າວວ່າ: ນອກເໜືອຈາກການຄົ້ນຄວ້າເອກະສານທາງປະຫວັດສາດແລ້ວ ລາວຍັງໄດ້ຮຽນຮູ້ ແລະເຂົ້າໃຈວິທີການຢ່າງເລີກເຊິ່ງຂອງນິນຈາ ເຊິ່ງນິນຈາຈະໃຊ້ເວລາຕອນເຊົ້າເພື່ອເຮັດກະສິກຳ ແລະ ຝຶກທັກສະດ້ານສິລະປະ ການຕໍ່ສູ້ ແລະ ໃຊ້ອາວຸດໃນຕອນສວຍ.

ດັ່ງນັ້ນ, ທ້າວ ມິດຊູຫາຊິ ຈຶ່ງໄດ້ປູກຜັກ ແລະ ຮຽນຮູ້ເຕັກນິກການນຳໃຊ້ສິລະປະການຕໍ່ສູ້ເພີ່ມເຕີມ ນອກເໜືອຈາກການຮຽນໃນຫ້ອງຮຽນ ເຊິ່ງລາວໄດ້ເວົ້າວ່າ: ການຮຽນແບບປະສົມແນວນີ້ຈະຊ່ວຍໃຫ້ລາວສາມາດຮຽນຮູ້ກ່ຽວກັບນິນຈາ ໄດ້ຢ່າງແທ້ຈິງ ແລະ ນິນຈາຍັງຖກກ່າວເຖິງວ່າເປັນນັກຂ້າທີ່ລັກສັງຫານໃນຊຸດດໍາ ທີ່ມີຊື່ສຽງໃນການຮັກສາຄວາມລັບ ແລະ ນິນຈາ ຍັງມີທັກສະການເອົາໂຕໄດ້ເປັນຢ່າງດີອີກດ້ວຍ. ນອກຈາກນັ້ນ, ທ້າວ ມິດຊູຫາຊິ ຍັງໄດ້ສຶກສາດ້ານກັງຟູ ແລະ ສິລະການຕໍ່ສູ້ແບບຍີ່ປຸ່ນຂອງຍີ່ປຸ່ນ ເຊິ່ງເອີ້ນວ່າ Shorinji Kempo.

ມະຫາວິທະຍາໄລມິເອະໄດ້ສ້າງຕັ້ງສູນຄົ້ນຄວ້າແຫ່ງທຳອິດຂອງໂລກທີ່ອຸທິດຕົນໃຫ້ແກ່ນິນຈາ ໃນປີ 2017 ແລະ ໄດ້ເປີດຫຼັກສູດການສຶກສາໃນປີຕໍ່ມາ. ຢູ່ແຂວງມີເອະມີເມືອງໜຶ່ງຊື່ວ່າ ອີງະ (Iga) ເຊິ່ງເຄີຍເປັນບ່ອນຕົ້ນກຳເນີດຂອງນິນຈາ.

ທ່ານ ຢູຈິ ຢາມາດະ (Yuji Yamada), ສາດສະດາຈານປະຫວັດສາດຍີ່ປຸ່ນຂອງມະຫາວິທະຍາໄລມິເອະ ຜູ້ທີ່ຮັບຜິດຊອບຫຼັກສູດນິນຈາ, ຮູ້ສຶກປະຫຼາດໃຈວ່າ ທ່າວ ມິດຊູຫາຊິ ໄດ້ອຸທິດຕົນ ແລະ ທຸ້ມເທຢ່າງຫຼວງຫຼາຍໃຫ້ກັບການສຶກສາວິຊານິນຈາ. "ພວກເຮົາມີຫ້ອງຮຽນປະຫວັດສາດ ແລະ ຫລັກສູດກ່ຽວກັບທັກສະນິນຈາ. ແຕ່ບໍ່ຄາດວ່າທ່າວ ມິດຊູຫາຊິ ຈະອຸທິດຕົນເອງໃນການຮຽນຮູ້ວິຊານິນຈາຫຼາຍເຖິງຂະໜາດນີ້ຄືກັບວ່ານິນຈາຍັງມີຊີວິດຢູ່ໃນໂລກ" ທ່ານ ຢາມາດະ ກ່າວ.

"ສຳລັບການລົງທະບຽນເຂົ້າຮຽນ ນັກຮຽນຕ້ອງໄດ້ສອບເສັງປະຫວັດສາດຍີ່ປຸ່ນ ແລະ ການທົດສອບການອ່ານເອກະສານ ປະຫວັດສາດຂອງນິນຈາ ເຊິ່ງໃນແຕ່ລະປີຈະມີນັກຮຽນເຂົ້າຮຽນທັງໝົດ 3 ຄົນ ເຊິ່ງຖືວ່າວິຊານີ້ຍັງເປັນທີ່ຕ້ອງການຢູ່ ແລະ ພວກເຮົາໄດ້ຮັບຄໍາຖາມຫຼາຍຄຳຖາມຈາກຕ່າງປະເທດ ໂດຍທີ່ພວກເຮົາຕ້ອງການທີ່ຈະເວົ້າບາງຢ່າງກ່ຽວກັບຫຼັກສູດນີ້ວ່າເປັນຫຼັກສູດທີ່ຈະຮຽນຮູ້ກ່ຽວກັບນິນຈາ, ບໍ່ແມ່ນຮຽນຈົບເພື່ອເປັນນິນຈາ” ສາດສະດາຈານປະຫວັດສາດໄດ້ເວົ້າສະຫລຸບ.

----------------------------------------

👉 ທ່ານສາມາດອ່ານຂໍ້ຂ່າວອື່ນໆໄດ້ຢູ່ດ້ານລຸ່ມ 👇

👉 ຢ່າລືມ ກົດໄລຄ໌ Like 👍, ກົດຕິດຕາມ See first 🌟 ເພື່ອບໍ່ພາດໃນການຕິດຕາມຂ່າວສານດີໆ, ໜ້າສົນໃຈ ແລະ ເປັນກຳລັງໃຈໃຫ້ພວກເຮົາດ້ວຍ. 🇫 Nep2020