ສະຫະລັດປະກາດວ່າຈີນກຳລັງສ້າງເຄືອຂ່າຍທາງການທະຫານໃນມະຫາສະມຸດອິນເດຍ

ສະຫະລັດບອກວ່າຈີນກຳລັງສ້າງເຄືອຂ່າຍທາງການທະຫານໃນມະຫາສະມຸດອິນເດຍ ພ້ອມທັງເລັງພື້ນທີ່ໃນປະເທດຕ່າງໆໃນອາຊີເພື່ອສ້າງຖານທັບ. ສ່ວນທາງດ້ານຈີນປະຕິເສດວ່າບໍ່ໄດ້ຫວັງຂະຫຍາຍອຳນາດ, ແຕ່ຕ້ອງການສ້າງສັນຕິພາບ.

ກະຊວງປ້ອງກັນປະເທດສະຫະລັດໄດ້ເຜີຍແຜ່ເອກກະສານເລື່ອງອຳນາດທາງທະຫານຂອງຈີນຕໍ່ສະພາບຄອງເກຣດ ໂດຍລະບຸວ່າ ຈີນກຳລັງສ້າງເຄືອຂ່າຍການຂົນສົ່ງທາງການທະຫານ ເພື່ອໃຫ້ຄວບຄຸມພາກພື້ນມະຫາສະມຸດອິນເດຍ ແລະ ຍັງບອກອີກວ່າ ອີກສອງທົດສະວັດ, ກອງທັບເຮືອຈີນຈະກາຍເປັນກອງທັບທີ່ໃຫຍ່ທີ່ສຸດໃນໂລກ ລວມເຖີງຈະມີຄັງອາວຸດ ແລະ ຂີປະນາວຸດເຕັກໂນໂລຊີຂັ້ນສູງ.

ປະຈຸບັນກອງທັບເຮືອຂອງຈີນມີເຮືອຮົບເທີງໜ້ານໍ້າ ແລະ ເຮືອດຳນໍ້າໄວ້ໃນການຄອຍຄອງກວ່າ 350 ລໍາ. ຂະນະທີ່ສະຫະລັດມີເຮືອປະຈໍາການໃນກອງທັບ 293 ລໍາ.

ເອກກະສານກວ່າ 200 ໜ້າດັ່ງກ່າວຂອງກະຊວງປ້ອງກັນປະເທດສະຫະລັດ ຍັງໄດ້ລະບຸວ່າຈີນອາດຈະໃຊ້ມຽນມາ, ໄທ, ສິງກະໂປ, ອິນໂດເນເຊຍ, ປາກິສະຖານ, ສີລັງກາ ແລະ ປະເທດອື່ນໆໃນທະວີບອັບຟຼີກາ ແລະ ອາຊີກາງ ໃນການສ້າງຖານທັບເພື່ອລໍາລຽງອາວຸດທາງການທະຫານ. ແຕ່ໃນຂະນະດຽວກັນຜູ້ຊ່ຽວຊານລະບຸວ່າຫຼາຍປະເທດຈະບໍ່ຍອມໃຫ້ຈີນຕັ້ງຖານທັບໃນພື້ນທີ່ຂອງປະເທດເລົ່ານີ້ ໂດຍສະເພາະໃນສິງກະໂປ, ອິນໂດເນເຊຍ ແລະ ມຽນມາ.

ປະຈຸບັນຈີນມີຖານທັບແຫ່ງດຽວທີ່ຕັ້ງຢູ່ນອກປະເທດ, ນັ້ນກໍ່ຄື ຢູ່ໃນປະເທດຈີບູຕິໃນອັບຟຼີກາ ໂດຍຈີນບອກວ່າ ຖານທັບດັ່ງກ່າວຈີນໃຊ້ເພື່ອສະໜັບສະໜູນພາລະກິດໃຫ້ຄວາມຊ່ວຍເຫຼືອດ້ານສິດທິມະນຸດ.

ທັງນີ້ ສະຫະລັດຍັງເຊື່ອວ່າຈີນໄດ້ເຊັນສັນຍາລັບກັບກຳປູເຈຍ ເພື່ອອະນຸຍາດໃຫ້ຈີນສາມາດຕັ້ງກອງທະຫານໃນຖານທັບເຮືອໃນກຳປູເຈຍໄດ້, ແຕ່ກຳປູເຈຍໄດ້ອອກມາປະຕິເສດຕໍ່ເລື່ອງດັ່ງກ່າວວ່າບໍ່ເປັນຄວາມຈິງແຕ່ຢ່າງໃດ.

ຂະນະທີ່ຈີນບອກວ່າ ຈີນຈະບໍ່ຂະຫຍາຍອຳນາດ ຫຼື ອິດທິພົນໃດໆ ແລະ ຍົກໃຫ້ເຫັນການກະທຳຂອງຈີນແມ່ນເປັນໄປຕາມແນວທາງຂອງການສ້າງສັນຕິສຸກ ແລະ ເຮັດຕາມທຳນຽມປະຫວັດສາດເທົ່ານັ້ນ.

ໃນປີ 2017, ທ່ານ ສີ ຈີ້ນຜິງ, ປະທານປະເທດຂອງຈີນ ໄດ້ກ່າວວ່າ ຈີນຕັ້ງເປົ້າໃຫ້ກອງທັບປົດປ່ອຍປະຊາຊົນຈີນ ປະຕິຮູບເປັນກອງທັບທີ່ທັນສະໃໝພາຍໃນປີ 2035 ແລະ ເປັນໜຶ່ງໃນກອງທັບລະດັບໂລກພາຍໃນກາງສະຕະວັດນີ້.

----------------------------------------

👉 ທ່ານສາມາດອ່ານຂໍ້ຂ່າວອື່ນໆໄດ້ຢູ່ທາງດ້ານລຸ່ມ 👇

👉 ຢ່າລືມ ກົດໄລຄ໌ Like 👍, ກົດຕິດຕາມ See first 🌟 ເພື່ອບໍ່ພາດໃນການຕິດຕາມຂ່າວສານດີໆ, ໜ້າສົນໃຈ ແລະ ເປັນກຳລັງໃຈໃຫ້ພວກເຮົາດ້ວຍ. 🇫 Nep2020