ຈີນປ່ຽນໃຈຕຽມນໍາເຂົ້າສິນຄ້າທາງດ້ານການກະສິກຳຈາກສະຫະລັດເພີ່ມຂຶ້ນ ເພື່ອປະຕິບັດຕາມຂໍຕົກລົງການຄ້າ ໄລຍະທີ 1

ກ່ອນໜ້ານີ້, ສປ. ຈີນ ໄດ້ໂຕ້ກັບສະຫະລັດ, ໂດຍການສັ່ງໂຈະການນໍາເຂົ້າສິນຄ້າທາງດ້ານການກະສິກຳຈາກສະຫະລັດ. ເນື່ອງຈາກບໍ່ພໍໃຈປະທານາທິບໍດີຂອງສະຫະລັດ ສັ່ງໃຫ້ທິມງານເລີ່ມດຳເນີນການຫຼຸດສິດທີ່ປະໂຫຍດທີ່ສະຫະລັດເຄີຍໃຫ້ກັບຮົງກົງເປັນພິເສດ ທາງດ້ານເສດຖະກິດ-ສັງຄົມ, ການເມືອງ ແລະ ເຕັກໂນໂລຊີ ເຊັ່ນ: ສົນທິສັນຍາສົ່ງຜູ້ຮ້າຍຂ້າມແດນ, ສິດທິປະໂຫຍດດ້ານການສົງອອກ ແລະ ການພັດທະນາ ຫຼື ຖ່າຍທອດເຕັກໂນໂລຊີໃຫ້ກັບຮົງກົງ ເພື່ອກົດດັນຈີນ ພາຍຫຼັງທີ່ຈີນໄດ້ຜ່ານກົດໝາຍຄວາມໜັ້ນຄົງຂອງຮົງກົງສະບັບໃຫມ່ອອກມາ. ດັ່ງນັ້ນ, ທາງດ້ານລັດຖະບານຈີນ ຈຶ່ງໄດ້ໂຕ້ກັບໂດຍການສັ່ງໃຫ້ບໍລິສັດທາງດ້ານການກະສິກຳລາຍໃຫຍ່ຂອງຈີນ ເຊັ່ນ: ບໍລິສັດ Cofco ແລະ Sinograin ໂຈະການນໍາເຂົ້າສິນຄ້າທາງດ້ານການກະສິກຳຈາກສະຫະລັດ ເຊັ່ນ: ຊີ້ນໝູ, ຊີ້ນໄກ່ ແລະ ສິນຄ້າອື່ນໆ.

ແຕ່ປະຈຸບັນ, ສະຖານະການສົງຄາມການຄ້າຫຼ້າສຸດຂອງສອງຊາດມະຫາອຳນາດຂອງໂລກ ເລີ່ມມີຂ່າວດີອອກມາ ຫຼັງຈາກທີ່ມື້ວານນີ້ຈີນວາງແຜນຕຽມນໍາເຂົ້າສິນຄ້າທາງດ້ານການກະສິກຳຈາກສະຫະລັດ ເຊັ່ນ: ຖົ່ວເຫຼືອງ, ສາລີ, ອາຫານທະເລ ແລະ ອື່ນໆ ເພື່ອປະຕິບັດຕາມຂໍຕົກລົງການຄ້າໄລຍະທີ 1. ທັງນີ້ຈີນໄດ້ໃຫ້ຄໍາໝັ້ນສັນຍາວ່າຈະຊື້ສິນຄ້າທາງດ້ານການກະສິກຳຈາກສະຫະລັດໃຫ້ໄດ້ຕາມຂໍ້ຕົກລົງ ໄລຍະທີ 1, ລວມເປັນມູນຄ່າທັງໝົດ 3.56 ໝຶ່ນລ້ານໂດລາ, ແຕ່ໃນຊ່ວງ 4 ເດືອນທຳອິດຂອງປີນີ້ ຈີນໄດ້ຊື້ສິນຄ້າທາງດ້ານການກະສິກຳຈາກສະຫະລັດພຽງແຕ່ 4.65 ພັນລ້ານໂດລາ, ຄິດເປັນພຽງ 13% ຂອງມູນຄ່າທີ່ໄດ້ຕົກລົງກັນໄວ້ເທົ່່ານັ້ນ.

ໃນນະຂະດຽວກັນ, ຈີນໄດ້ສັ່ງຫ້າມນໍາເຂົ້າຊີ້ນສັດ ລວມເຖິງຜະລິດຕະພັນຊີນສັດທຸກປະເພດຈາກເຢັຍລະມັນ ເພື່ອຄວບຄຸມການແຜ່ລະບາດຂອງພະຍາດ Covid-19 ພາຍຫຼັງທີ່ໄດ້ກວດພົບພະນັກງານຂອງບໍລິສັດ ທອນນິສ໌ ເຊິ່ງເປັນໂຮງງານແປຮູບຊີ້ນສັດລາຍໃຫຍ່ຂອງເຢັຍລະມັນຕິດເຊື້ອພະຍາດ Covid-19 ຫຼາຍເຖິງ 650 ຄົນ ຈາກຜູ້ທີ່ເຂົ້າຮ່ວມກວດຫາເຊື້ອທັງໝົດກວ່າ 1,000 ຄົນ. ຫຼ້າສຸດທາງການເຢັຍລະມັນໄດ້ສັ່ງປິດໂຮງງານແປຮູບຊີ້ນສັດດັ່ງກ່າວແລ້ວ, ແຕ່ການໂຈະການນໍາເຂົ້າຊີ້ນສັດໃນຄັ້ງນີ້ກໍ່ສົ່ງຜົນກະທົບຢ່າງຮຸນແຮງຕໍ່ຄວາມໝັ້ນຄົງທາງດ້ານອາຫານຂອງປະເທດ ແລະ ຕໍ່ຜູ້ບໍລິໂພກຈີນສູງເຖິງ 1.4 ພັນລ້ານຄົນ.

ທາງດ້ານສະຖານະການການແຜ່ລະຍາດຂອງພະຍາດ Covid-19 ທີ່ນະຄອນຫຼວງປັກກິ່ງ, ຫຼ້າສຸດທາງການຈີນໄດ້ປະກາດວ່າສາມາດຄວບຄຸມການແຜ່ລະບາດຮອບ 2 ໄດ້ແລ້ວ, ແຕ່ກໍ່ບໍ່ໄດ້ໝາຍຄວາມວ່າຈະບໍ່ພົບຜູ້ຕິດເຊື່ອເພີ່ມຂຶ້ນເລີຍ ພຽງແຕ່ຜູ້ຕິດເຊື້ອຈະຄ່ອຍໆຫຼຸດຈໍານວນລົງ ເຊິ່ງໃນຂະນະນີ້ມີຈໍານວນຜູ້ຕິດເຊື່ອລາຍໃໝ່ຢູ່ທີ່ 127 ຄົນເປັ່ນຢ່າງຕໍ່າ. ເຊິ່ງກ່ອນໜ້ານີ້ຊ້ວງອາທິດທີ່ຜ່ານມາ, ປັກກິ່ງ ປະກາດພາວະສະຖານະການສຸກເສີນພາຍຫຼັງພົບຜູ້ຕິດເຊື້ອ Covid-19 ຫຼາຍຄົນໃນເຂດຕະຫຼາດຊິນຟາຕີ (Xinfadi) ໃນເຂດເຟິງໄຖ. ຈາກການເກັບຕົວຢ່າງສານຄັດລັ່ງຈາກກຸ່ມຄົນທີ່ມີຄວາມໃກ້ສິດກັບເຂດຕະຫຼາດຈໍານວນ 517 ຄົນ, ພົບວ່າມີຜູ້ຕິດເຊື້ອໄວລັດທີ່ບໍ່ສະແດງອາການຈໍານວນ 45 ຄົນ. ເຮັດໃຫ້ປະຈຸບັນທາງການປັກກິ່ງໄດ້ສັ່ງໃຫ້ມີການປິດຕະຫຼາດດັ່ງກ່າວ ລວມທັງຕະຫຼາດຄ້າສົ່ງອື່ນໆທົ່ວເມືອງຫຼວງປັກກິ່ງ. ນອກຈາກນີ້, ເຈົ້າໜ້າທີ່ໄດ້ມີຄໍາສັ່ງໃຫ້ຄົນໃນບໍລິເວນຕະຫຼາດຈໍານວນຫຼາຍກວ່າ 1 ແສນຄົນ ຕ້ອງໄດ້ເຂົ້າຮັບການກວດຫາເຊື້ອພະຍາດ Covid-19 ແລະ ພ້ອມທັງໄດ້ເຍີກເລີກແຜນເປີດຮຽນຂອງນັກຮຽນຊັ້ນປະຖົມສຶກສາປີ 1-3 ໃນທີ່ຈະມີຂຶ້ນວັນທີ 15 ມິຖຸນາ ອີກດ້ວຍ.

ສໍາລັບໂຕເລກຜູ້ຕິດເຊື້ອພະຍາດ Covid-19 ໃນຈີນຫຼ້າສຸດ (20 ມິຖຸນາ 2020), ຈໍານວນຜູ້ຕິດເຊື້ອລວມ 8.33 ໜຶ່ນກວ່າຄົນ. ເສຍຊີວິດ 4,634 ຄົນ ແລະ ປິ່ນປົວເຊົາແລ້ວ 7.84 ໝຶ່ນກວ່າຄົນ.

----------------------------------------

👉 ທ່ານສາມາດອ່ານຂໍ້ຂ່າວອື່ນໆໄດ້ຢູ່ດ້ານລຸ່ມ 👇

👉 ຢ່າລືມ ກົດໄລຄ໌ Like 👍, ກົດຕິດຕາມ See first 🌟 ເພື່ອບໍ່ພາດໃນການຕິດຕາມຂ່າວສານດີໆ, ໜ້າສົນໃຈ ແລະ ເປັນກຳລັງໃຈໃຫ້ພວກເຮົາດ້ວຍ. 🇫 Nep2020