ພາດສະປອດປະເທດໃດຊົງພະລັງທີ່ສຸດໃນໂລກ ແລະ ພາດສະປອດຂອງລາວຢູ່ອັນດັບທີເທົ່າໃດຂອງໂລກ ໃນປີ 2020

ຄົນທຸກໆຊາດທົ່ວໂລກເວລາຈະເດີນທາງໄປຕ່າງປະເທດກໍ່ຈະຕ້ອງມີສິ່ງໜຶ່ງທີ່ຄືກັນ ແລະ ຈໍາເປັນ ນັ້ນກໍ່ຄື: ໜັງສືຜ່ານແດນ ຫຼື ພາດສະປອດ (Passport) ນັ້ນເອງ. ທ່ານຮູ້ບໍ່ວ່າແຕ່ລະປະເທດເຖິງວ່າຈະມີພາດສະປອດໜ້າຕາຄ້າຍເຄືອງກັນ, ແຕ່ພາດສະປອດຂອງທຸກປະເທດນັ້ນມີຂິດພະລັງ ຫຼື ພາວເວີ້ (Power) ບໍ່ເທົ່າກັນ. ໃນມື້ນີ້ທາງ NEP2020 ຈະພາທ່ານມາຮູ້ຈັກກັບພາດສະປອດປະເທດໃດທີ່ມີອຳນາດ ຫຼື ຊົງພະລັງ ທີ່ສຸດໃນໂລກ ແລະ ພາດສະປອດຂອງລາວເຮົາຢູ່ອັນດັບທີເທົ່າໃດຂອງໂລກ?

ພາດສະປອດຂອງປະເທດໃດຊົງພະລັງທີ່ສຸດ ເຂົາວັດກັນແນວໃດ? ຄໍາຕອບກໍ່ຄືເຂົາວັດກັນຢູ່ທີ່ວ່າ ພາດສະປອດປະເທດນັ້ນສາມາດເດີນທາງເຂົ້າໄປປະເທດອື່ນໆໄດ້ໂດຍທີ່ບໍ່ຕ້ອງຂໍວີຊາ (Visa) ນັ້ນເອງ. ຄົນລາວຂອງເຮົາອາດຈະຄຸ້ມເຄີຍໃນການກຽມເອກກະສານຕ່າງໆໃນການຂໍວີຊາກ່ອນຈະເດີນທາງໄປຕ່າງປະເທດ ໂດຍສະເພາະແມ່ນປະເທດທີ່ມີຄວາມຈະເລີນ ຫຼື ພັດທະນາແລ້ວ, ແຕ່ມີຫຼາຍປະເທດທີ່ເຂົາມີພາດສະປອດທີ່ຊົງພະລັງເຮັດໃຫ້ສາມາດເດີນທາງໄປໄດ້ທົ່ວໂລກໂດຍທີ່ເກືອບບໍ່ຈໍາເປັນຕ້ອງຂໍວີຊາເລີຍ. ທີ່ກ່າວມາໃນເບື້ອງຕົ້ນນີ້ຫຼາຍຄົນອາດຈະຮູ້ຈັກກັນແດ່ແລ້ວ, ແຕ່ທ່ານຮູ້ບໍ່ວ່າພາດສະປອດຂອງປະເທດໃດທີ່ຊົງພະລັງທີ່ສຸດ?

ຫຼາຍຄົນອາດຈະຄິດວ່າຕ້ອງເປັນພາດສະປອດຂອງປະເທດມະຫາອໍານາດຂອງໂລກ ເຊັນ: ສະຫະລັດອາເມລິກາ, ອັງກິດ, ຈີນ ຫຼື ບັນດາປະເທດທີ່ພັດທະນາຫຼາຍແລ້ວຢູ່ແຖວສະແກນດີເນວຽນ, ແຕ່ຄໍາຕອບອາດເຮັດໃຫ້ຫຼາຍໆຄົນປະຫຼາດໃຈ. ເພາະວ່າພາດສະປອດທີ່ຊົງພະລັງທີ່ສຸດ 3 ອັນດັບທຳອິດຂອງໂລກຕົກເປັນຂອງປະເທດໃນທະວີບອາຊີທັງໝົດ.

ໂດຍອ້າງອີງຈາກຖານຂໍ້ມູນຂອງ ສະມາຄົມຂົນສົ່ງທາງອາກາດລະຫວ່າງປະເທດ (International Air Transportation Association ຫຼື IATA), ທຸກໆປີເວບໄຊທ໌ Henley Passport Index ຈະຈັດອັນດັບພາດສະປອດທີ່ຊົງພະລັງທີ່ສຸດຂອງໂລກ ເຊິ່ງຈະວັດຈາກຈໍານວນປະເທດທີ່ພາດສະປອດເຫຼັ້ມນັ້ນສາມາດເດີນທາງເຂົາໄປໄດ້ໂດຍທີ່ບໍ່ຕ້ອງຂໍວີຊານັ້ນເອງ ແລະ ຫຼ້າສຸດປີ 2020, ພາດສະປອດທີ່ຖືກຈັດໃຫ້ເປັນພາດສະປອດທີ່ຊົງພະລັງທີ່ສຸດຂອງໂລກ ໄດ້ແກ່: ພາດສະປອດຂອງປະເທດຍີ່ປຸ່ນ.

ເຊິ່ງພາດສະປອດຂອງປະເທດຍີ່ປຸ່ນແມ່ນໄດ້ຄອງອັນດັບໜຶ່ງມາເປັນເວລາຕິດຕໍ່ກັນເຖິງ 3 ປີຊ້ອນແລ້ວ. ໂດຍຄ່າພາດສະປອດ ອິນເດັກ  ຫຼື ດັດສະນີພາດສະປອດ (Passport Index) ຂອງປະເທດນີ້ຢູ່ທີ່ 191 ປະເທດ ເຊິ່ງນັ້ນກໍ່ໝາຍຄວາມວ່າ ຄົນທີ່ຖືພາດສະປອດປະເທດຍີ່ປຸ່ນ ຈະສາມາດເດີນທາງເຂົາໄປປະເທດອື່ນໂດຍທີ່ບໍ່ຕ້ອງຂໍວີຊາໄດ້ເຖີງ 191 ປະເທດທົ່ວໂລກນັ້ນເອງ (ຂໍພຽງມີແຕ່ເງິນໃຊ້ຈ່າຍໃນການເດີນທາງກໍ່ສາມາດໄປໄດ້ທົ່ວໂລກເລີຍ ໂອເນາະອິດສາເດ). ສ່ວນອັນດັບທີ 2 ຕົກເປັນຂອງປະເທດໃກ້ກັບປະເທດຂອງພວກເຮົາແດ່, ນັ້ນກໍ່ຄື: ປະເທດສິງຄະໂປ ແລະ ຄ່າພາດສະປອດ ອິນເດັກຢູ່ທີ່ 190 ປະເທດທົ່ວໂລກ.

ສ່ວນອັນດັບທີ 3 ປະກອບມີ 2 ປະເທດ ນັ້ນກໍ່ຄື: ພາດສະປອດປະເທດເກົາຫຼີໃຕ້ ແລະ ເຢັຍລະມັນ ເຊິ່ງຄ່າພາດສະປອດ ອິນເດັກຂອງ 2 ປະເທດນີ້ຢູ່ທີ່ 189 ປະເທດ.

ສໍາລັບປະເທດອື່ນໆຂອງທະວິບອາຊີທີ່ມີພາດສະປອດທີ່ຊົງພະລັງແດ່ ເຊັ່ນ: ປະເທດມາເລເຊຍ ອັນດັບທີ 14 (ຄ່າພາດສະປອດອິນເດັກ 178 ປະເທດ), ປະເທດຮົງກົງ ອັນດັບທີ 19 (ຄ່າພາດສະປອດອິນເດັກ 170 ປະເທດ). ສ່ວນພາດສະປອດປະເທດໃຕ້ຫວັນເປັນທີ່ໜ້າສົນໃຈຢູ່ບ່ອນວ່າ ຈາກທຳອິດຢູ່ອັນດັບທີ 69 ຂອງໂລກ ແລະ ໄດ້ໄຕ່ອັນດັບຂຶ້ນມາເລື້ອຍໆເປັນອັນດັບທີ 32 ຂອງໂລກພາຍໄລຍະເວລາພຽງ 10 ປີເທົ່ານັ້ນ ເຊິ່ງສາມາດເຂົ້າປະເທດອື່ນໄດ້ເຖິງ 146 ປະເທດໂດຍທີ່ບໍ່ຕ້ອງຂໍວີຊ້າ. ສ່ວນຍັກໃຫຍ່ຂອງທະວີບອາຊີຢ່າງປະເທດຈີນຢູ່ທີ່ອັນດັບທີ 72, ສາມາດເຂົ້າປະເທດອື່ນໄດ້ພຽງແຕ່ 71 ປະເທດໂດຍທີ່ບໍ່ຕ້ອງຂໍວີຊາ ເຊິ່ງມີອັບດັບເທົ່າກັບປະເທດອິນໂດເນເຊຍ ແລະ ແຄນຢາ.

ສ່ວນພາດສະປອດລາວຂອງພວກເຮົາຢູ່ອັນດັບທີ 93 ຂອງໂລກ, ສາມາດເດີນທາງເຂົ້າໄປປະເທດອື່ນໄດ້ 50 ປະເທດທົ່ວໂລກ ໂດຍທີ່ບໍ່ຕ້ອງຂໍວີຊ້າ ຫຼື ສາມາດເຮັດວີຊາອອນອະໄລໂວ (Visa on arrival) ໄດ້. Visa on arrival ແມ່ນວີຊາທີ່ສາມາດເຮັດໄດ້ຢູ່ບ່ອນປ່ອງບໍລິການວີຊາຂອງດ່ານກວດຄົນເຂົ້າເມືອງ, ສາມາດເຮັດໄດ້ຕອນເດີນທາງໄປເຖິງປະເທດທີ່ເປັນຈຸດໝາຍປາຍທາງ ເຊິ່ງວີຊາປະເພດນີ້ນັກທ່ອງທ່ຽວສາມາດຂໍໄດ້ເລີຍຢູ່ປ່ອງບໍລິການວີຊາຂອງຈຸດກວດຄົນເຂົ້າເມືອງຂອງປະເທດນັ້ນໆ ໂດຍທີ່ບໍ່ຈໍາເປັນທີ່ຈະຕ້ອງກວດສອບລ່ວງໜ້າ.

ແລະ ພາດສະປອດທີ່ຊົງພະລັງໜ້ອຍທີ່ສຸດຂອງໂລກ ໄດ້ແກ່: ພາດສະປອດປະເທດ ອັບການິດສະຖານ (Afghanistan) ຢູ່ສຸດທ້າຍຂອງໂລກຄືອັນດັບທີ 109 ແລະ ສາມາດເດີນທາງເຂົ້າໄດ້ພຽງແຕ່ 26 ປະເທດເທົ່ານັ້ນໂດຍທີ່ບໍ່ຕ້ອງຂໍວີຊາ. ຢ່າງໃດກໍ່ການການຈັດພາດສະປອດແບບນີ້, ທາງເວບໄຊທ໌ຈະຈັດອັບດັບພຽງແຕ່ພາດສະປອດທົ່ວໄປສໍາລັບປະຊາຊົນເທົ່ານັ້ນ, ບໍ່ໄດ້ນັບລວມພາດສະປອດທາງລັດຖະການ ຫຼື ທາງການທູດແຕ່ຢ່າງໃດ. ເນື່ອງຈາກວ່າ, ພາດສະປອດພວກນີ້ຈະມີຂໍຍົກເວັ້ນຫຼາຍໆຢ່າງໃນການເຂົ້າໄດ້ຫຼາຍປະເທດໂດຍຍົກເວັ້ນວີຊານັ້ນເອງ.

----------------------------------------

👉 ທ່ານສາມາດອ່ານຂໍ້ຂ່າວອື່ນໆໄດ້ຢູ່ດ້ານລຸ່ມ 👇

👉 ຢ່າລືມ ກົດໄລຄ໌ Like 👍, ກົດຕິດຕາມ See first 🌟 ເພື່ອບໍ່ພາດໃນການຕິດຕາມຂ່າວສານດີໆ, ໜ້າສົນໃຈ ແລະ ເປັນກຳລັງໃຈໃຫ້ພວກເຮົາດ້ວຍ. 🇫 Nep2020