ບໍລິສັດ Huawei ເສຍໃຫ້ Nokia ແລະ Ericsson, ບໍ່ໄດ້ວາງເຄືອຂ່າຍລະບົບ 5G ຢູ່ປະເທດສິງກະໂປ

ບໍລິສັດຫົວເຫວີຍ (Huawei) ເສຍໃຫ້ຂູ່ແຂ່ງ, ບໍ່ໄດ້ວາງເຄືອຂ່າຍລະບົບ 5G ຢູ່ປະເທດສິງກະໂປ. ບໍລິສັດໂທລະຄົມມະນາຄົມຍັກໃຫຍ່ຂອງສິງກະໂປເລືອກ ບໍລິສັດ Nokia ແລະ Ericsson ໃຫ້ເປັນຜູ້ວາງເຄືອຂ່າຍ 5G ຢູ່ສິງກະໂປ.

ໃນປະເທດສິງກະໂປມີບໍລິສັດໃຫ້ບໍລິການເຄື່ອຂ່າຍໂທລະສັບມືຖື ແລະ ໂທລະຄົມມະນາຄົມຍັກໃຫຍ່ຫຼາຍບໍລິສັດ ເຊັ່ນ: ບໍລິສັດ Singtel, ບໍລິສັດ StarHub ແລະ ບໍລິສັດ M1. ກ່ອນໜ້ານີ້, ບໍລິສັດເຫລົ່ານີ້ໄດ້ມີການປຶກສາຫາລືກັນວ່າຈະໃຫ້ບໍລິສັດໃດເຂົ້າມາວາງເຄື່ອຂ່າຍລະບົບ 5G ໃນປະເທດ ໂດຍມີຊື່ບໍລິສັດທີ່ທີ່ຖືກກ່າວເຖິງ ຄື: ບໍລິສັດ Nokia, Ericsson ແລະ Huawei ທີ່ເປັນຍັກໃຫຍ່ດ້ານການສື່ສານຂອງຈີນ.

ຫຼ້າສຸດ, ຊ້ວງອາທິດທີ່ຜ່ານມາ ບໍລິສັດ Singtel, ບໍລິສັດໂທລະຄົມມະນາຄົມຍັກໃຫຍ່ໃນສິງກະໂປ. ໄດ້ປະກາດເລືອກເອົາ ບໍລິສັດ Ericsson ເຊິ່ງເປັນບໍລິສັດຈາກປະເທດສະວີເດັນ ໃຫ້ເຂົ້າມາວາງເຄືອຂ່າຍລະບົບ 5G ແລະ  ເຂົ້າມາເປັນສ່ວນຮ່ວມຂອງບໍລິສັດ ເຊິ່ງລັດຖະບານສິງກະໂປເອງກໍ່ໄດ້ອະນຸມັດແລ້ວເປັນທີ່ຮຽບຮ້ອຍ.

ໃນຂະນະທີ່ຜູ້ໃຫ້ບໍລິການດ້ານໂທລະຄົມມະນາຄົມໃຫຍ່ອີກ 2 ແຫ່ງຂອງ ສິງກະໂປ ກໍ່ຄື: ບໍລິສັດ StarHub ແລະ M1, ກໍ່ໄດ້ເລືອກ ບໍລິສັດ Nokia ເຊິ່ງເປັນບໍລິສັດຈາກປະເທດຟິນແລນ ໃຫ້ເຂົ້າມາພັດທະນາພັດທະນາລະບົບ 5G. ສ່ວນ ບໍລິສັດ Huawei ຈະໄດ້ຮັບພຽງສັນຍາການໃນການໃຫ້ບໍລິການເຄືອຂ່າຍໃນລະດັບທ້ອງຖິ່ນຈຂອງ ບໍລິສັດ TPG Telecom ເຊິ່ງເປັນຜູ້ໃຫ້ບໍລິການລາຍຍ່ອຍໃນສິງກະໂປເທົ່ານັ້ນ.

ເຖິງຢ່າງໃດກໍ່ຕາມ, ບໍລິສັດທັງສອງກ່າວວ່າ: ບໍລິສັດອື່ນໆ ລວມທັງ ບໍລິສັດ Huawei ອາດຈະສາມາດເຂົ້າມາຮ່ວມກັນພັດທະນາລະບົບໃນສ່ວນອື່ນໄດ້ເຊັ່ນດຽວກັນ, ແຕ່ອາດຈະມີຂໍ້ຈຳກັດໃນການເຂົ້າໄປມີສ່ວນຮ່ວມໃນການພັດທະນາແລະ ເປັນຂະໜາດຂອງໂຄງການທີ່ນ້ອຍກວ່າ.

ທາງດ້ານລັດຖະບານສິງກະໂປພະຍາຍາມຮັກສາການພົວພັນທີ່ດີກັບຈີນ ແລະ ອາເມລິກາ ໂດຍໄດ້ຢັ້ງຢືນວ່າ: ບໍ່ໄດ້ມີການຕັດບໍລິສັດໃດອອກຈາກຂະບວນການພິຈາລະນາຢ່າງແນ່ນອນ ພ້ອມທັງໄດ້ມີການໃຫ້ໂອກາດແກ່ບໍລິສັດຕ່າງໆ ເຂົ້າມາມີສ່ວນຮ່ວມເພີ່ມຕື່ມໃນດ້ານຕ່າງໆ ໃນອະນາຄົດອີກດ້ວຍ

ກ່ອນໜ້ານີ້, ສະຫະລັດອາເມລິກາໄດ້ກ່າວ ບໍລິສັດ Huawei ວ່າ ໄດ້ມີການລັກຂໍ້ມູນຄວາມລັບທາງການຄ້າ ແລະ ເປັນເຄື່ອງມືໃນການສອດແນມປະເທດຕ່າງໆຂອງລັດຖະບານຈີນ ເຮັດໃຫ້ທາງດ້ານລັດຖະບານສະຫະລັດ ຂຶ້ນບັນຊີດຳ ບໍລິສັດ Huawei ແລະ ໄດ້ພະຍາຍາມຊັກຊວນໃຫ້ພັນທະມິດຂອງສະຫະລັດອາເມລິກາທົ່ວໂລກ ປິດກັ້ນ ບໍລິສັດ Huawei ອອກຈາກໂຄງການພັດທະນາລະບົບ 5G ໃນປະເທດຕ່າງໆ ເຊິ່ງ ບໍລິສັດ Huawei ກໍ່ໄດ້ປະຕິເສດຂໍ້ກ່າວຫານີ້ມາໂດຍຕະຫຼອດວ່າບໍ່ໄດ້ມີການພົວພັນກັບທາງດ້ານລັດຖະບານຈີນແຕ່ຢ່າງໃດເລີຍ.

ທັງນີ້, ຕ້ົນປີ 2022 ປະເທດສິງກະໂປໄດ້ກຳນົດເປົ້າໝາຍ ແລະ ວາງແຜນການທີ່ຈະເລີ່ມພັດທະນາເຄືອຂ່າຍ 5G ເຊິ່ງຄາດວ່າຈະມີການພັດທະນາຢ່າງໜ້ອຍໃຫ້ໄດ້ຄວບຄຸມເຄິ່ງໜຶ່ງຂອງປະເທດໃນທ້າຍປີ 2022 ແລະ ຄາດວ່າຈະໃຫ້ ສຳເລັດທັງໝົດໃນຂອບເຂດທົ່ວປະເທດໃນປີ 2025.

----------------------------------------

👉 ທ່ານສາມາດອ່ານຂໍ້ຂ່າວອື່ນໆໄດ້ຢູ່ດ້ານລຸ່ມ 👇

👉 ຢ່າລືມ ກົດໄລຄ໌ Like 👍, ກົດຕິດຕາມ See first 🌟 ເພື່ອບໍ່ພາດໃນການຕິດຕາມຂ່າວສານດີໆ, ໜ້າສົນໃຈ ແລະ ເປັນກຳລັງໃຈໃຫ້ພວກເຮົາດ້ວຍ. 🇫 Nep2020