ຜູ້ນໍາສອງຊາດ ຈີນ-ຣັດເຊຍ ຈັບມືຕໍ່ຕ້ານລັດທິມະຫາອຳນາດຂົ້ວດຽວ

ວັນທີ 8 ກໍລະກົດ, ທ່ານ ສີ ຈີ້ນຜິງ, ປະທານປະເທດຈີນ ໄດ້ໂທລະສັບເພື່ອໂອລົມກັບ ທ່ານ ວະລາດີເມຍ ປູຕິນ, ປະທານາທິບໍດີຣັດເຊຍ ໂດຍເປັນການລົມກັນເປັນຄັ້ງທີ 4 ຂອງຜູ້ນໍາທັງສອງຊາດນັບຕັ້ງແຕ່ເກີດເຫດການແພ່ລະບາດຂອງພະຍາດ Covid-19. ຜູ້ນໍາຈີນໄດ້ຢັ້ງຢືນອີກຄັ້ງວ່າ ຈີນ ແລະ ຣັດເຊຍ ຈະສະໜັບສະໜູນເຊິ່ງກັນແລະກັນ ເພື່ອຕໍ່ຕ້ານການແຊກແຊງຈາກພາຍນອກ ແລະ ປົກປ້ອງອະທິປະໄຕ, ຄວາມໝັ້ນຄົງ ແລະ ຜົນປະໂຫຍດໃນການພັດທະນາຂອງສອງຊາດ.

ຜູ້ນໍາຈີນຍັງໄດ້ກ່າວອີກວ່າ ຣັດເຊຍ ໄດ້ສົ່ງສັນຍານໃຫ້ກັບໂລກໂດຍການຈັດພິທີສະເຫຼີມສະຫຼອງວັນແຫ່ງໄຊຊະນະ (Victory Day) ໃນວັນທີ 24 ເດືອນມິຖຸນາ ທີ່ຜ່ານມາ ເພື່ອເປັນການລະລຶກເຖີງເລື່ອງຂອງປະຫວັດສາດ ແລະ ສັນຍາລັກຂອງການປົກປ້ອງສັນຕິພາບ. ນອກຈາກນີ້, ການລົງຄະແນ່ນສຽງຢ່າງຫຼວງຫຼາຍຂອງປະຊາຊົນຣັດເຊຍ ເພື່ອເຫັນດີໃຫ້ມີການແກ້ໄຂລັດຖະທຳມະນູນໄດ້ສະແດງໃຫ້ເຫັນເຖີງສຽງສະໜັບສະໜູນຂອງປະຊາຊົນທີ່ມີຕໍ່ລັດຖະບານຣັດເຊຍຊຸດປະຈຸບັນ.

ຈີນຈະສະໜັບສະໜູນເສັ້ນທາງການພັດທະນາຂອງຣັດເຊຍໄປຕະຫຼອດ ຫາກເສັ້ນທາງນັ້ນເໝາະສົມກັບສະຖານະການຂອງຈີນ ແລະ ຍັງຈະສະໜັບສະໜູນຄວາມພະຍາຍາມຂອງຣັດເຊຍ ສໍາລັບເປົ້າໝາຍພັດທະນາ ແລະ ຟື້ນຟູປະເທດໃຫ້ມີຄວາມເຂັ້ມແຂງຂຶ້ນໄປເລື່ອຍໆ.

ສໍາລັບສະຖານະການໂລກທີ່ກຳລັງມີການປ່ຽນແປງໄປຢ່າງໄວວາ, ທ່ານ ສີ ຈີ້ນຜິງ ໄດ້ລະບຸວ່າ ຈີນ ແລະ ຣັດເຊຍ ເປັນຄູ່ຮ່ວມທາງຍຸດທະສາດ ແລະ ມີການຮ່ວມມືທີ່ຄວບຄຸມ ແລະ ຍັງຕ້ອງການຮັດແໜ້ນຄວາມສໍາພັນໃນການສືສານໃຫ້ແໜ້ນແຟ້ນຫຼາຍຂຶ້ນກວ່າເກົ່າ.

"ຈີນ ແລະ ຣັດເຊຍ ໃຫ້ການສະໜັບສະໜູນ ແລະ ຊ່ວຍເຫຼືອເຊິ່ງກັນແລະກັນ ໃນຊ້ວງທີ່ພະຍາດ Covid-19 ແພ່ລະບາດຢ່າງຮຸນແຮງ ເຊິ່ງນັ້ນເປັນປັດໃຈໃຫມ່ໆທີ່ລະດັບຄວາມສໍາພັນລະຫວ່າງຈີນ ແລະ ຣັດເຊຍ ກ້າວໄປສູ່ອີກຍຸກໜຶ່ງ. ທັງສອງໄປເທດໄດ້ໃຊ້ມາດຕະການທີ່ຍຶດຢຸ່ນ ເພື່ອເລັ່ງການເຮັດວຽກ ແລະ ການຜະລິດໃນທຸກໆພາກສ່ວນ. ຂະນະດຽວກັນກໍ່ຕ້ອງດໍາເນີນການໃນໄລຍະຍາວ ເພື່ອຕໍ່ສູ້ກັບການແພ່ລະດາດຂອງໂລກນໍາ. ທັງສອງປະເທດຄວນຮ່ວມມືກັນໃນຫຼາຍໆສ່ວນ ເຊັ່ນ: ເຕັກໂນໂລຊີຂັ້ນສູງ, ການວິໄຈ, ການພັດທະນາວັກແຊງ ແລະ ຍາຮັກສາໂລກ ລວມເຖີງຄວາມໝັ້ນຄົງທາງຊີວະພາບ. ຈີນຕ້ອງການເສີມຄວາມເຂັ້ມແຂງທາງດ້ານການຮ່ວມມືແບບພະຫຸພາຄີກັບຫຼາຍພາກສ່ວນ ລວມເຖີງສະຫະປະຊາຊາດ ເພື່ອຕໍ່ຕ້ານການໃຊ້ອຳນາດຄວບຄຸມ ແລະ ລັດທິເອກະພາບນິຍົມ (unilateralism), ປົກປ້ອງຄວາມຍຸຕິທຳຂອງໂລກ ແລະ ສ້າງຊຸມຊົນທີ່ແບ່ງປັນອານາຄົດຮ່ວມກັນ" ປະທານປະເທດຈີນກ່າວ.

ທາງດ້ານ ທ່ານ ປູຕິນ ໄດ້ກ່າວວ່າ "ການທີ່ປະຊາຊົນສ່ວນໃຫຍ່ຍອມຮັບການແກ້ລັດຖະທຳມະນູນຜ່ານການລົງຄະແນນສຽງເປັນເລື່ອງທີ່ດີໃນການຮັກສາສະຖຽນລະພາບທາງການເມືອງຂອງຣັດເຊຍໃນໄລຍະຍາວ, ຊ່ວຍຮັກສາອະທິປະໄຕຂອງຊາດ ແລະ ຕໍ່ຕ້ານການເຂົ້າແຊກແຊງຂອງຕ່າງຊາດ. ທັງຣັດເຊຍ ແລະ ຈີນ ຕ່າງກໍ່ສະໜັບສະໜູນເຊິ່ງກັນແລະກັນມາຕະຫຼອດໃນການປົກປ້ອງອະທິປະໄຕ ແລະ ຄວາມໝັ້ນຄົງຂອງທັງສອງຊາດ. ການທີ່ທັງສອງປະເທດໃຫ້ການສະໜັບສະໜູນກັນແລະກັນໃນຊ້ວງໂລກລະບາດ ລວມທັງການທີ່ຈີນເຂົ້າຮ່ວມງານສະເຫຼີມສະຫຼອງວັນແຫ່ງໄຊຊະນະຍ່ອມພິສູດໃຫ້ເຫັນເຖີງຄວາມສໍາພັນທີ່ໃກ້ຊິດລະຫວ່າງກັນ. ເພື່ອເປັນການຢັ້ງຢືນວ່າຄວາມສໍາພັນລະຫວ່າງຣັດເຊຍ ແລະ ຈີນ ນັ້ນຢູ່ໃນສະພາບທີ່ດີທີ່ສຸດໃນປະຫວັດສາດ. ຣັດເຊຍສະໜັບສະໜູນຄວາມພະຍາຍາມຂອງຈີນໃນການປົກປ້ອງຄວາມໝັ້ນຄົງຂອງຊາດໃນເຂດບໍລິຫານພິເສດຮ່ອງກົງ ແລະ ຕໍ່ຕ້ານການຍຸແຍ່ ແລະ ປຸກປັ່ນທີ່ກະທົບຕໍ່ອະທິປະໄຕແຫ່ງຊາດຂອງຈີນ. ໂດຍຣັດເຊຍເຊື່ອວ່າຈີນນັ້ນຈະສາມາດບັນລຸເປົ້າໝາຍຄວາມຈະເລີນຮຸ່ງເຮືອງ ແລະ ສະຖຽນລະພາບຂອງຮ່ອງກົງໃນໄລຍະຍາວຢ່າງແນ່ນອນ".

ໃນເຊິງຄວາມສໍາພັນລະຫວ່າງສອງປະເທດ, ຜູ້ນໍາຣັດເຊຍຢັ້ງຢືນວ່າ ສໍາລັບຣັດເຊຍແລ້ວ ຈີນນັ້ນຖືກຈັດໃນລໍາດັບສູງທີ່ສຸດ ໂດຍຣັດເຊຍຕ້ອງການຈະຮ່ວມມືກັບຈີນ ໃນການສະໜັບສະໜູນການປະຕິບັດງານໄດ້ແທ້ , ເສີມສ້າງຄວາມສໍາພັນພາຍໃຕ້ກອບການຮ່ວມມືແບບພະຫຸພາຄີ ເພື່ອປົກປ້ອງຍຸດທະສາດຄວາມໝັ້ນຄົງ ແລະ ສະຖຽນລະພາບຂອງໂລກ.

ນອກຈາກນີ້, ປະທານາທິບໍດີຣັດເຊຍຍັງໄດ້ສະແດງຄວາມເສັຍໃຈຕໍ່ຜູ້ນໍາຈີນກໍລະນີນໍ້າຖ້ວມທີ່ສ້າງຄວາມເສັຍຫາຍໃຫ້ກັບພື້ນທີ່ຫຼາຍແຫ່ງທາງຕອນໃຕ້ຂອງຈີນອີກດ້ວຍ ໂດຍທີ່ຜູ້ນໍາຈີນໄດ້ກ່າວຂອບໃຈຜູ້ນໍາຣັດເຊຍ.

----------------------------------------

👉 ທ່ານສາມາດອ່ານຂໍ້ຂ່າວອື່ນໆໄດ້ຢູ່ດ້ານລຸ່ມ 👇

👉 ຢ່າລືມ ກົດໄລຄ໌ Like 👍, ກົດຕິດຕາມ See first 🌟 ເພື່ອບໍ່ພາດໃນການຕິດຕາມຂ່າວສານດີໆ, ໜ້າສົນໃຈ ແລະ ເປັນກຳລັງໃຈໃຫ້ພວກເຮົາດ້ວຍ. 🇫 Nep2020