ໜຸ່ນຈີນຕິດຄຸກຟຼີ 27 ປີ, ອອກຄຸກມາເກືອບຈື່ໜ້າຄົນໃນຄອບຄົວບໍ່ໄດ້.

ຍ້ອນກັບໄປໃນປີ 1993 ໝຸ່ມຈີນຈາກເມືອງໜານຊາງ, ຊື່ວ່າ ທ້າວ ຈາງ ວີ່ຫວນ ຖືກຈອງຈໍາເນື່ອງຈາກຕົກເປັນຜູ້ຕ້ອງຫາໃນຄະດີຄາດຕະກຳເດັກນ້ອຍຊາຍ 2 ຄົນ, ອາຍຸ 4 ປີ ແລະ 6 ປີ. ຕໍ່ມາໃນເດືອນມັງກອນ ປີ 1995, ສານໄດ້ຕັດສີນປະຫານຊີວິດລາວ, ແຕ່ເນື່ອງຈາກຮັບສາລະພາບສານເລີຍຫຼຸດໂທດໃຫ້ເຫຼືອພຽງແຕ່ຕິດຄຸກຕະຫຼອດຊີວິດ.

ນັບຕັ້ງແຕ່ມື້ນັ້ນເປັນຕົ້ນມາ, ທ້າວ ຈາງ ກໍ່ໄດ້ຖືກຕັດອິດສະລະພາບມາໂດຍຕະຫຼອດ ເຊິ່ງລາວໄດ້ອ້າງມາໂດຍຕະຫຼອດວ່າຕົນເອງເປັນຜູ້ບໍລິສຸດ ແລະ ບໍ່ໄດ້ເປັນຄົນກໍ່ເຫດຄາດຕະກຳດັ່ງກ່າວ, ແຕ່ສາເຫດທີ່ຕ້ອງຍອມຮັບສາລະພາບຜິດນັ້ນ ເປັນຍ້ອນລາວທົນການຖືກທໍລະມານ 6 ມື້ 6 ຄືນ ຕິດຕໍ່ກັນບໍ່ໄຫວ.

ນອກຈາກນີ້, ໃນວັນທີ 3 ພະຈິກ 1993, ເຈົ້າໜ້າທີ່ຜູ້ສືບສວນຄະດີຂອງລາວຍັງໄດ້ນໍາເອົາໝາລ່າເນື້ອ 2 ໂຕມາ ແລ້ວຂູ່ລາວວ່າຈະປ່ອຍໃຫ້ໝາກັດລາວຖ້າບໍ່ຍອມຮັບສາລະພາບຜິດ. ທ້າວ ຈາງ ຖືກໝາກັດຈົນໂສ້ງຂາດ, ເລືອດໄຫຼອາບຂາໂຕ້ຂອງລາວ ແລະ ດ້ວຍຄວາມຢ້ານກົວເຖີງຂິດສຸດ ລາວຈຶ່ງໄດ້ຍອມຮັບສາລະພາບວ່າເປັນຄົນລົງມືຂ້າເດັກນ້ອຍທັງ 2 ຄົນດັ່ງກ່າວ.

ສ່ວນທາງຄອບຄົວຂອງລາວ ກໍ່ໄດ້ພະຍາຍາມຕໍ່ສູ້ເພື່ອຮຽກຮ້ອງຄວາມເປັນທຳໃຫ້ແກ່ ທ້າວ ຈາງ ມາໂດຍຕະຫຼອດ ໂດຍການຍື່ນອຸທອນໄປຫຼາຍຄັ້ງ, ແຕ່ກໍ່ຖືກປະຕິເສດມາໂດຍຕະຫຼອດ. ອ້າຍຂອງ ທ້າວ ຈາງ ໄດ້ຂຽນຈົດໝາຍຮ້ອງທຸກຫຼາຍກວ່າ 1,000 ສະບັບ ເພື່ອໃຫ້ມີການປ່ອຍໂຕນ້ອງຊາຍ.

ເວລາຜ່ານໄປຈົນມາຮອດເດືອນສິງຫາ 2017, ທ້າວ ຈາງໄດ້ຍື່ນເລື່ອງຢ່າງເປັນທາງການຕໍ່ສານປະຊາຊົນສູງສຸດແຫ່ງ ສປ ຈີນ ຂອງແຂວງຈຽງຊີ ເພື່ອໃຫ້ມີການຮັບພິຈາລະນາຕັດສີນຄະດີນີ້ຄືນໃຫມ່ ເຊິ່ງຄໍາຮ້ອງຂອງລາວໄດ້ຮັບການຍອມຮັບໃນທີ່ສຸດ. ສົ່ງຜົນໃຫ້ມີການຕັດສີນຄະດີຂອງລາວຄືນໃຫມ່ອີກຄັ້ງ. ພາຍຫຼັງໄດ້ພິຈາລະນາແລ້ວ, ສານໄດ້ພົບວ່າຄະດີຂອງ ທ້າວ ຈາງ ຍັງຂາດ "ຂໍ້ມູນທີ່ແທ້ຈິງ ຫຼື ຂໍ້ມູນທີ່ຊັດເຈນ ແລະ ຫຼັກຖານທີ່ພຽງພໍ" ຈຶ່ງໄດ້ພິພາກສາໃຫ້ລາວພົ້ນຜິດໃນ 2-3 ມື້ທີ່ຜ່ານມານີ້. ທະນາຍຄວາມຂອງ ທ້າວ ຈາງ ກ່າວວ່າ: ລູກຄວາມຂອງລາວຖືກໝາລ່າເນື້ອກັດທີ່ຂາໂຕຈົນມີຮອຍແຜເປັນ ແລະ ທາງລູກຄວາມຂອງລາວຈະຮຽກຮ້ອງຄ່າຊົດເຊີຍຈາກການຕັດສີນທີ່ບໍ່ມີຄວາມເປັນທຳ.

ສື່ຝຣັ່ງໄດ້ຊີ້ໃຫ້ເຫັນວ່າ: ບັນດາທະນາຍທີ່ຕໍ່ສູ້ດ້ານສິດທິມະນຸດ ມັກຈະຕັ້ງຄຳຖາມກ່ຽວກັບຄວາມຍຸຕິທຳຂອງສານຈີນມາຢູ່ສະເໝີວ່າ ເປັນຫຍັງອັດຕາການຕັດສີນໂທດວ່າຈໍາເລີຍມີຄວາມຜິດຈຶ່ງສູງເຖິງ 99% (ໃຜຖືກສັ່ງຟ້ອງ ເວລາໄປຮອດສານແລ້ວ 99% ສານຈະຕັດສີນວ່າຜິດແທ້).

ພາຍຫຼັງທີ່ຜົນການຕັດສີນໃຫມ່ນີ້ອອກມາ, ຕົວແທນຂອງສານແຂວງຈຽງຊີກໍ່ໄດ້ກ່າວຂໍໂທດ ທ້າວ ຈາງ ວີ່ຫວນ ພ້ອມທັງລະບຸວ່າລາວມີສິດທີ່ຈະຍື່ນເລື່ອງຂໍຄ່າຊົດເຊີຍຈາກລັດໄດ້. ກໍລະນີຂອງ ທ້າວ ຈາງ ຖືເປັນການກັກຂັງຜູ້ບໍລິສຸດທີ່ດົນນານທີ່ສຸດ ເນື່ອງຈາກລາວຖືກຄຸມຂັງເຖີງ 9,778 ມື້ ເຊິ່ງລາວໄດ້ຕຽມທີ່ຈະຮຽກຮ້ອງຄ່າຊົດເຊີຍເປັນຈໍານວນເງິນ 7 ລ້ານຢວນ ຫຼື ປະມານ 9,198 ລ້ານກີບ. ນອກຈາກນີ້, ລາວຍັງຕ້ອງການໃຫ້ມີການດຳເນີນຄະດີທາງກົດໝາຍຕໍ່ເຈົ້າໜ້າທີ່ທີ່ມີສ່ວນໃນການບັງຄັບ ແລະ ກົດດັນໃຫ້ລາວຮັບສາລະພາບຜິດອີກດ້ວຍ.

"ຂ້ອຍຖືກຈັບໃນຕອນເປັນໄວໜຸ່ມ ແລະ ໄດ້ກັບອອກມາໃນຕອນທີ່ສູງໄວແລ້ວ. ແຕ່ເຖີງຢ່າງໃດກໍ່ຕາມ, ຂ້ອຍກໍ່ຕ້ອງຂອບໃຈລັດຖະບານທີ່ໄດ້ມອບຄວາມບໍລິສຸດຄືນໃຫ້ກັບຂ້ອຍ" ທ້າວ ຈາງ ກ່າວກະນັກຂ່າວທ້ອງຖີ່ນ.

ໃນລະຫວ່າງທີ່ ທ້າວ ຈາງ ຕິດຄຸກຢູ່ນັ້ນ, ຊີວິດຄົນໃນຄອບຄົວຂອງລາວກໍ່ບໍ່ໄດ້ດີປານໃດ. ເມຍຂອງລາວຕ້ອງລ້ຽງລູກນ້ອຍ 2 ຄົນ ໂດຍທີ່ປາສະຈາກລາຍໄດ້. ເມຍຂອງ ທ້າວ ຈາງ ໄດ້ແຕ່ງງານໃຫມ່ອີກ 6 ປີໃຫ້ຫຼັງ ແລະ ບັດນີ້ລູກໆ 2 ຄົນຂອງລາວກໍ່ໄດ້ເຕີບໃຫຍ່ ແລະ ແຕ່ງງານມີຄອບຄົວໄປໝົດແລ້ວ ເຮັດໃຫ້ ທ້າວ ຈາງ ໄດ້ອອກຄຸກມາໃນຖານະທີ່ເປັນພໍ່ຕູ້ຂອງຫຼານຊາຍຄົນທຳອິດຂອງລາວທີ່ມີອາຍຸໄດ້ 12 ປີແລ້ວ.

ທ້າວ ຈາງ ຍັງໄດ້ໃຫ້ສຳພາດກັບສື່ອອນໄລນ໌ວ່າ "ຂ້ອຍໄດ້ພົບກັບບັນດາຍາດຕິພີ່ນ້ອງ, ແຕ່ກໍ່ມີຫຼາຍຄົນທີ່ຂ້ອຍຈື່ບໍ່ໄດ້". ລາວເລົ່າວ່າ: "ແມ່ຂອງຂ້ອຍ ເຊິ່ງປະຈຸບັນອາຍຸໄດ້ 84 ປີແລ້ວ. ໃບໜ້າຂອງລາວແມ່ນຄົນທີ່ຂ້ອຍຈື່ບໍ່ໄດ້ຫຼາຍທີ່ສຸດ".

ຍ້ອນກັບໄປເບີ່ງການຕັດສີນຄະດີທີ່ຜິດພາດກ່ອນໜ້າຄະດີຂອງ ທ້າວ ຈາງ, ໄດ້ມີຄະດີໜຶ່ງຂອງ ທ້າວ ຫຼິວ ຈົ້ງຫຼີນ ຖືກພິພາກສາ ແລະ ຕິດຄຸກຕອນອາຍຸ 22 ປີ ແລະ ມາຖືກປ່ອຍໂຕອອກຈາກຄຸກໃນອີກ 25 ປີຕໍ່ມາ. ທ້າວ ຫຼິວ ໄດ້ຖືກຄຸມຂັງໃນຄຸກເປັນເວລາ 9,217 ມື້. ລາວໄດ້ຮຽກຮ້ອງຄ່າຊົດເຊີຍຈາກລັດທີ່ໄດ້ຕັດອິດສະລະພາບລາວໄປ ບວກກັບຜົນກະທົບທາງຈິດໃຈ ເປັນຈໍານວນເງິນທັງໝົດ 4,6 ລ້ານຢວນ ປະມານ 6,000 ລ້ານກີບ ຫຼື ປະມານ 500 ຢວນຕໍ່ມື້ທີ່ລາວຕິດຄຸກ.

----------------------------------------

👉 ທ່ານສາມາດອ່ານຂໍ້ຂ່າວອື່ນໆໄດ້ຢູ່ດ້ານລຸ່ມ 👇

👉 ຢ່າລືມ ກົດໄລຄ໌ Like 👍, ກົດຕິດຕາມ See first 🌟 ເພື່ອບໍ່ພາດໃນການຕິດຕາມຂ່າວສານດີໆ, ໜ້າສົນໃຈ ແລະ ເປັນກຳລັງໃຈໃຫ້ພວກເຮົາດ້ວຍ. 🇫 Nep2020