ເສັງໄດ້ທີ 4 ຂອງແຂວງ, ແຕ່ເລືອກຮຽນໂບຮານຄະດີເລີຍຖືກດ່າວ່າໂງ່.

2-3 ມື້ມານີ້ ໄດ້ມີເລື່ອງທີ່ເປັນກະແສໃນໂລກອອນໄລນ໌ຂອງຈີນ ໂດຍທີ່ເລື່ອງມີຢູ່ວ່າ: ມີນ້ອງນັກຮຽນຍິງຈີນຄົນໜຶ່ງຮຽນເກັ່ງ ເສັງຈົບຊັ້ນມັດທະຍົມປາຍທົ່ວປະເທດໄດ້ທີ 4 ຂອງແຂວງຫູໜານ ແລະ ສາມາດເຂົ້າຮຽນທີ່ມະຫາວິທະຍາໄລປັກກິ່ງ ດ້ວຍຄະແນນທີ່ສູງ, ແຕ່ລາວພັດເລືອກຮຽນໃນສາຂາໂບຮານຄະດີ ເລີຍເຮັດໃຫ້ຜູ້ຄົນໃນໂລກອອນໄລນ໌ ພາກັນວິພາກວິຈານລາວຢ່າງໃຫຍ່ ໂດຍເວົ້າໃຫ້ລາວວ່າໂງ່.

ມະຫາວິທະຍາໄລປັກກິ່ງ (Peking University) ເປັນມະຫາວິທະຍາໄລທີ່ມີຊື່ສຽງອັນດັບຕົ້ນໆຂອງຈີນເລີຍກໍ່ວ່າໄດ້ ແລະ ເປັນອັນດັບທີ 23 ຂອງການຈັດອັນດັບມະຫາວິທະຍາໄລທົ່ວໂລກ. ການທີ່ຈະສອບເສັງ ຫຼື ມີສິດທີ່ຈະສາມາດເຂົ້າຮຽນໃນມະຫາວິທະຍາໄລແຫ່ງນີ້ບໍ່ແມ່ນເລື່ອງງ່າຍໆ. ດັ່ງນັ້ນ, ມັນຈຶ່ງເປັນທີ່ໄຝ່ຝັນຂອງນ້ອງນັກຮຽນ ແລະ ຂອງພໍ່ແມ່ຜູ້ປົກຄອງທີ່ຕ້ອງການໃຫ້ລູກຂອງຕົນໄດ້ເຂົ້າຮຽນໃນມະຫາວິທະຍາໄລແຫ່ງນີ້.

ນ້ອງນັກຮຽນຍິງຄົນນີ້ມີຊື່ວ່າ: ນາງ ຈົງ ຟາງຫຼົງ, ເປັນລູກຊາວນາ, ອາໃສຢູ່ທີ່ແຂວງຫູໜານຂອງປະເທດຈີນ. ພໍ່ແມ່ຂອງລາວ ແມ່ນໄປເຮັດວຽກຢູ່ຕ່າງແຂວງ ເລີຍເຮັດໃຫ້ລາວຢູ່ກັບປູ່ ແລະ ຍ່າຂອງລາວມາໂດຍຕະຫຼອດ. ສະນັ້ນ, ເລື່ອງການສຶກສາຮໍ່າຮຽນແມ່ນບໍ່ມີໃຜສາມາດຊ່ວຍລາວໄດ້ນອກຈາກໂຕຂອງລາວເອງທີ່ໄດ້ດຸໝັ່ນ ແລະ ອົດທົນໃນການເອົາໃຈໃສ່ສຶກສາຮໍາຮຽນດ້ວຍຕົນເອງ.

ນາງ ຈົງ ຟາງຫຼົງ ສາມາດເສັງຈົບຊັ້ນມັດທະຍົມທົ່ວປະເທດ ໂດຍໄດ້ຄະແນນ 676 ຄະແນນ (ຄະແນນເຕັມ 750) ເຊິ່ງເປັນອັບດັບ 4 ຂອງແຂວງຫູໜານ. ທັນທີທີ່ຮູ້ຂ່າວ ບັນດາອາຈານສອນຂອງໂຮງຮຽນທີ່ລາວຮຽນຢູ່ປະມານ 50 ກວ່າຄົນໄດ້ພາກັນຂັບລົດກວ່າ 30 ກີໂລເເມັດ ເພື່ອເດີນທາງໄປເຮືອນລາວເຖີງວ່າໃນເວລານັ້ນຈະເປັນຍາມວິການກໍ່ຕາມ ເພື່ອສະແດງຄວາມຍິນດີກັບລູກສິດຄົນນີ້ ທີ່ໄດ້ສ້າງຊື່ສຽງໃຫ້ກັບໂຮງຮຽນ ແລະ ຄາດຫວັງວ່າລາວຈະເປັນອານາຄົດທີ່ດີຂອງໝູ່ບ້ານ.

ຈາກຜົນຂອງການສອບເສັງທີ່ດີດັ່ງກ່າວ ຈະເຮັດໃຫ້ລາວໄດ້ເຂົ້າຮຽນຕໍ່ໃນມະຫາວິທະຍາໄລປັກກິ່ງ ເຊິ່ງເປັນທີ່ໄຝ່ຝັນຂອງນັກຮຽນທັງຫຼາຍ. ນາງ ຈົງ ຟາງຫຼົງ ໄດ້ຕັດສິນໃຈເລືອກຮຽນສາຂາໂບຮານຄະດີ (Archaeology) ທີ່ມະຫາວິທະຍາໄລປັກກິ່ງ ເຊິ່ງເຮັດໃຫ້ຊາວເນັດພາກັນຕົກໃຈ ເມື່ອຊາບຂ່າວດັ່ງກ່າວ ຈຶ່ງເຮັດໃຫ້ໂລກອອນໄລນ໌ພາກັນວິພາກວິຈານກັນໄປຕ່າງໆນາວ່າ ລາວໂງ່, ເປັນຫຍັງໃນເມື່ອມີໂອກາດໄດ້ຮຽນທີ່ມະຫາວິທະຍາໄລດັ່ງຂະໜາດນີ້ແລ້ວ ຈຶ່ງບໍ່ເລືອກຮຽນສາຂາບໍລິຫານ ຫຼື ການເງິນ ເພື່ອຈະໄດ້ຈົບມາແລ້ວສາມາດມີເງິນເດືອນທີ່ສູງໆ ຫາເງິນໄດ້ຫຼາຍໆ. ຫຼາຍຄົນໃນໂລກອອນໄລນ໌ກໍ່ສະແດງຄວາມຄິດເຫັນໃນລັກສະນະທີ່ວ່າ: ການຮຽນໂບຮານຄະດີ ຈົບມາແລ້ວສິມີວຽກເຮັດ ຫຼື ບໍ່? ແຕ່ເຖິງສີມີວຽກເຮັດກະຄືສິທຸກຄືເກົ່າຕາມສະຕາຍລູກຊາວນາບ້ານນອກ, ພໍ່ແມ່ບໍ່ບອກບໍ່ສອນ ຫຼື ໃຊ້ຄໍາແຮງໆເຊັ່ນວ່າ: ລູກຊາວນາໂງ່ອີ່ຫຼີ ເລົ່ານີ້ເປັນຕົ້ນ.

ພາຍຫຼັງທີ່ເປັນຂ່າວດັ່ງໃນໂລກອອນໄລນ໌ແລ້ວ, ນາງ ຈົງ ຟາງຫຼົງ ກໍ່ໄດ້ອອກມາຕອບຊາວເນັດວ່າ: "ຂ້ອຍມັກປະຫວັດສາດຈີນ. ສໍາລັບຂ້ອຍແລ້ວຮູ້ສຶກວ່າການໄດ້ໄປສຳພັດກັບໂບຮານວັດຖຸຄືສີເຮັດໃຫ້ຂ້ອຍມີຄວາມມ່ວນຊື່ນ ແລະ ມີຄວາມສຸກເປັນຢ່າງຍິ່ງ. ຂໍຂອບໃຈທຸກໆຄົນທີ່ເປັນຮ່ວງຂ້ອຍ".

ສ່ວນສື່ກໍ່ບໍ່ພາດທີ່ຈະໄປສຳພາດພໍ່ຂອງລາວໃນປະເດັນດັ່ງກ່າວ ເຊິ່ງພໍ່ຂອງລາວກໍ່ໄດ້ຕອບວ່າ: "ລູກສາວເປັນຄົນງຽບໆ, ມັກອ່ານໜັງສືຕັ້ງແຕ່ນ້ອຍ. ລາວຢາກຮຽນອີຫຍັງໃຫ້ລາວຕັດສີນໃຈເອງ ຂ້ອຍຂໍໃຫ້ລາວມີຄວາມສຸກກັບສິ່ງທີ່ລາວເລືອກກໍ່ພໍໃຈລະ".

ເມື່ອເປັນຂ່າວດັງ, ວົງການໂບຮານຄະດີຈີນກໍ່ໃຫ້ຄວາມສົນໃຈ ແລະ ຕິດຕາມເລື່ອງນີ້ນໍາ ເຊິ່ງຫໍພິພິທະພັນ ແລະ ໜ່ວຍງານສຶກສາໂບຮານຄະດີທົ່ວປະເທດຕ່າງກໍ່ສະໜັບສະໜູນລາວ ໂດຍບອກວ່າ: ບໍ່ຕ້ອງເປັນຮ່ວງເລື່ອງມີວຽກເຮັດ. ຂໍພຽງແຕ່ຕັ້ງໃຈສຶກສາຮໍາຮຽນ ແລະ ໄດ້ຜົນການຮຽນທີ່ດີ.

ບັນດານັກໂບຮານຄະດີຍັງໄດ້ພາກັນສົ່ງໜັງສື, ຂອງຂວັນ ແລະ ຂອງທີ່ລະລຶກ ໄປໃຫ້ເພື່ອເປັນກຳລັງໃຈ ບອກວ່າໃຫ້ສູ້ໆ, ຢ່າທໍ້ຖອຍ ເຊັ່ນ: ສະຖາບັນວິໄຈວັດຖຸໂບຮານແຂວງເຫີໜານ ໄດ້ສົ່ງໜັງສື ການສຶກສາໂບຮານຄະດີຂອງແຂວງເຫີໜານ ພ້ອມອຸປະກອນການສຶກສາໂບຮານຊຸດໜຶ່ງໄປໃຫ້ລາວ.

ນອກຈາກນີ້, ນ້ອງຍັງໄດ້ຂອງຂວັນເປັນໜັງສືຊີວະປະຫວັດ ຂອງອາຈານ ຝັ້ນ ຈີ່ນສື ເຊິ່ງເປັນນັກໂບຮານຄະດີທີ່ມີຊື່ສຽງ ຂອງຈີນ ເຊິ່ງເປັນຜູ້ທີ່ນ້ອງມັກ ແລະ ເປັນແຮງບັນດານໃຈໜຶ່ງທີ່ເຮັດໃຫ້ຕັດສີນໃຈຮຽນສາຂານີ້ອີກດ້ວຍ.

----------------------------------------

👉 ທ່ານສາມາດອ່ານຂໍ້ຂ່າວອື່ນໆໄດ້ຢູ່ດ້ານລຸ່ມ 👇

👉 ຢ່າລືມ ກົດໄລຄ໌ Like 👍, ກົດຕິດຕາມ See first 🌟 ເພື່ອບໍ່ພາດໃນການຕິດຕາມຂ່າວສານດີໆ, ໜ້າສົນໃຈ ແລະ ເປັນກຳລັງໃຈໃຫ້ພວກເຮົາດ້ວຍ. 🇫 Nep2020