ຈີນເຕືອນຈະໂຕ້ຕອບ ຫາກສະຫະລັດເອົາຂິປະນາວຸດມາຈໍ່ໜ້າບ້ານຈີນ

ລັດຖະບານປັກກິ່ງເຕື່ອນວ່າພວກເຂົາຈະໃຊ້ມາດຕະການໂຕ້ຕອບ ຫາກສະຫະລັດເອົາຂີປະນາວຸດມາຕິດຕັ້ງໃນຂົງເຂດພາກພື້ນອາຊີ-ປາຊີຟີກ ໂດຍຈີນຢັ້ງຢືນທີ່ຈະໃຊ້ທຸກມາດຕະການໂຕ້ຕອບ ແລະ ຂົ່ມຂູ່ປະເທດໃດກໍ່ຕາມໃນເຂດນີ້ທີ່ຍິນຍອມໃຫ້ສະຫະລັດເຂົ້າມາຕິດຕັ້ງຂິປະນາວຸດດັ່ງກ່າວ.

ທ່ານ ຈ້າວ ລີຈຽນ, ໂຄສົກກະຊວງການຕ່າງປະເທດຈີນ ກ່າວເມືອວັນສຸກທີ່ຜ່ານມານີ້ວ່າ:

"ຄວາມພະຍາຍາມຂອງສະຫະລັດໃນການຕີດຕັ້ງຂິປະນາວຸດພິໃສກາງເທິງບົກນັ້ນ ແມ່ນສອດຄ່ອງກັບການມີຢູ່ທາງທະຫານທີ່ເພີ່ມຂຶ້ນໃນອາຊີ-ປາຊີຟີກ ເຊິ່ງໃນຊ້ວງຫຼາຍປີທີ່ຜ່ານມາ ເຊິ່ງເປັນການສະແດງໃຫ້ເຫັນເຖີງຄວາມຄິດຂອງສົງຄາມເຢັນດ້ວຍຄໍາເວົ້າ ແລະ ການກະທຳຂອງສະຫະລັດ ເຊິ່ງໄດ້ທຳລາຍສັນຕິພາບ ແລະ ຄວາມໝັ້ນຄົງໃນລະດັບພາກພື້ນ ແລະ ລະດັບໂລກຢ່າງຮຸນແຮງ".

"ທັງໝົດນີ້ສົ່ງຜົນກະທົບຕໍ່ການຄວບຄຸມອາວຸດລະຫວ່າງປະເທດ ແລະ ຂະບວນການປົດອາວຸດ ແລະ ຍັງໄດ້ຫຼຸດຄວາມໄວ້ວາງໃຈເຊິ່ງກັນແລະກັນລະຫວ່າງປະເທດຫຼັກໆ ລວມເຖິງທຳທາຍສັນຕິພາບທາງດ້ານຍຸດທະສາດຂອງໂລກ ເຊິ່ງເປັນອັນຕະລາຍຕໍ່ຜູ້ອື່ນ ແລະ ໂຕເອງ".

"ຈີນຄັດຄ້ານແຜນການຂອງສະຫະລັດໃນການຕິດຕັ້ງຂີປະນາວຸດພິໃສກາງເທິງບົກໃນຂົງເຂດອາຊີ-ປາຊີຟີກ ແລະ ພວກເຮົາບໍ່ພໍໃຈຢ່າງຮຸນແຮງຕໍ່ການເຄື່ອນໄຫວແບບຖີ່ໆ ເພື່ອກົດດັນປະເທດເພື່ອນບ້ານຂອງຈີນໃຫ້ຜິດກັບຈີນ ລວມເຖີງການທ້າທາຍຈີນຢ່າງເຊິ່ງໜ້າທີ່ປະຕູບ້ານຂອງພວກເຮົາເອງ".

"ພວກເຮົາຮຽກຮ້ອງໃຫ້ສະຫະລັດເຮັດຕາມກະແສຂອງຍຸກສະໄໝໃໝ່ ໂດຍການປະພຶດໂຕຕາມແນວທາງທີ່ມີຄວາມຮັບຜິດຊອບ ແລະ ເຮັດສິ່ງຕ່າງໆທີ່ເອື້ອຕໍ່ສັນຕິພາບ ລວມເຖິງເສລີພາບໃນຂົງເຂດພາກພື້ນ ແລະ ລະດັບໂລກ ແທນທີ່ການເຮັດໃນສິ່ງທີ່ກົງກັນຂ້າມກັບຫຼັກການທີ່ດີຢ່າງທີ່ສະຫະລັດໄດ້ເຮັດຢູ່ໃນປະຈຸບັນນີ້ ແລະ ຫາກສະຫະລັດຍັງຈະສືບຕໍ່ກ້າວໜ້າໄປໃນທາງທີ່ຜິດ ຈີນກໍ່ຈະນໍາໃຊ້ມາດຕະການໂຕ້ຕອບທີ່ຈໍາເປັນ ເພື່ອຮັກສາຜົນປະໂຫຍດດ້ານຄວາມໝັ້ນຄົງຂອງປະເທດເອົາໄວ້ ເພື່ອບໍ່ໃຫ້ໃຜມາສັ່ນສະເທືອນມັນໄດ້".

"ນອກຈາກນີ້, ພວກເຮົາຍັງຮຽກຮ້ອງໃຫ້ປະເທດຕ່າງໆ ໃນຂົງເຂດພາກພື້ນອາຊີ-ປາຊີຟີກ ໃຫ້ຄິດເຖິງເຈດຕະນາທີ່ແທ້ຈິງເບື້ອງຫຼັງຂອງສະຫະລັດ ແລະ ຜົນກະທົບຢ່າງຮຸນແຮງທີ່ຈະຕາມມາຈາກການເຄື່ອນໄຫວຂອງສະຫະລັດໃນຄັ້ງນີ້". 

"ຈີນຕ້ອງການໃຫ້ທຸກປະເທດໃນຂົງເຂດນີ້ ຢ່າສຸເປັນຂີ້ຂ້າໃຫ້ສະຫະລັດ". ໂຄສົກກ່າວປິດທ້າຍ.

ເລີ່ມດຸເດືອດຂຶ້ນມາເລື້ອຍໆລະຫວ່າງຄວາມສຳພັນ ຈີນ-ສະຫະລັດ ແລະ ບັນດາປະເທດພັນທະມິດ. ຕ່າງຝ່າຍຕ່າງໝູນໃຊ້ທຸກວິທີການ ເພື່ອໃຫ້ຕົນເອງເກີດຄວາມໄດ້ປຽບ ໃນປົກປ້ອງຜົນປະໂຫຍດຂອງຊາດຕົນເອງ.

----------------------------------------

👉 ທ່ານສາມາດອ່ານຂໍ້ຂ່າວອື່ນໆໄດ້ຢູ່ດ້ານລຸ່ມ 👇

👉 ຢ່າລືມ ກົດໄລຄ໌ Like 👍, ກົດຕິດຕາມ See first 🌟 ເພື່ອບໍ່ພາດໃນການຕິດຕາມຂ່າວສານດີໆ, ໜ້າສົນໃຈ ແລະ ເປັນກຳລັງໃຈໃຫ້ພວກເຮົາດ້ວຍ. 🇫 Nep2020