3 ຂໍ້ທີ່ສະຫະລັດຍອມຮັບເອງວ່າຈີນໄດ້ພັດທະນາທາງດ້ານການທະຫານທຽບເທົ່າ ຫຼື ແຊງໜ້າສະຫະລັດໄປແລ້ວ

ກະຊວງປ້ອງກັນປະເທດສະຫະລັດ ໄດ້ອອກບົດລາຍງານປະຈໍາປີ 2020 ເພື່ອສົ່ງໃຫ້ສະພາຂອງສະຫະລັດ ໂດຍມີຫົວຂໍ້ວ່າ: "ການພັດທະນາດ້ານການທະຫານ ແລະ ຄວາມໜັ້ນຄົງ ກ່ຽວກັບ ສປ. ຈີນ ຫຼື Military And Security Developments Involving The People's Republic of China 2020" ເຊິ່ງເປັນບົດລາຍງານທີ່ຈະຖືກຂຽນຂຶ້ນມາທຸກປີ ເພື່ອວິເຄາະພັດທະນາການທາງດ້ານການທະຫານ ແລະ ຄວາມໝັ້ນຄົງຂອງຈີນ ໃນຕະຫຼອດໄລຍະທີ່ຜ່ານມາ ແລະ ແນວໂນ້ມທີ່ເປັນໄປໄດ້ໃນອານາຄົດ.

ໃນອາທິດແລ້ວນີ້, ພາຍຫຼັງທີ່ບົດລາຍງານສະບັບນີ້ໄດ້ຖືກເຜີຍແຜ່ອອກມາ, ສໍານັກຂ່າວຕ່າງໆກໍ່ໄດ້ເອົາເນື້ອໃນສຳຄັນຂອງບົດລາຍງານໄປຂຽນຂ່າວເປັນຫົວຂໍ່ເດັ່ນໆ ແລະ ນໍາສະເໜີອອກໄປທົ່ວໂລກມາແລ້ວ ເຊັ່ນວ່າ:

"ສະຫະລັດມີຄວາມກັງວົນວ່າຈີນຈະເພີ່ມຫົວຣົບນິວເຄຍເປັນ 2 ເທົ່າໃນອີກ 10 ຂ້າງໜ້າ" ຫຼື

"ສະຫະລັດປະກາດວ່າຈີນກຳລັງສ້າງເຄືອຂ່າຍທາງການທະຫານ (ຖານທັບ) ໃນພາກພື້ນປະເທດອາຊີ" ເລົ່ານີ້ເປັນຕົ້ນ. 

ແຕ່ຍັງມີອີກປະເດັນໜຶ່ງທີ່ສຳຄັນທີ່ໄດ້ຂຽນໄວ້ໃນບົດລາຍງານທີ່ຍັງບໍ່ທັນເປັນຂ່າວ. ສະນັ້ນ, ມື້ນີ້ເລີຍຈະຍົກເອົາປະເດັນສຳຄັນອີກປະເດັນໜຶ່ງທີ່ໄດ້ຂຽນໄວ້ໃນບົດລາຍງານສະບັບນີ້ມານໍາສະເໜີໃຫ້ທຸກທ່ານໄດ້ອ່ານນໍາກັນ. ເຮົາມາເລີ່ມກັນເລີຍ:

"3 ຂໍ້ທີ່ກະຊວງປ້ອງກັນປະເທດສະຫະລັດຍອມຮັບເອງວ່າຈີນໄດ້ພັດທະນາຄວາມທັນສະໄໝທາງດ້ານການທະຫານທຽບເທົ່າ ຫຼື ແຊງໜ້າສະຫະລັດໄປແລ້ວ" ເຊິ່ງໄດ້ແກ່:

1. ການຕໍ່ເຮືອຮົບ ຫຼື ສ້າງເຮືອຮົບ: ປະຈຸບັນຈີນມີກອງທັບເຮືອທີ່ໃຫຍ່ທີ່ສຸດໃນໂລກໄປແລ້ວ ເຊິ່ງກອງທັບເຮືອທັງໝົດຂອງຈີນນັ້ນລວມທັງເຮືອຮົບເທີງໜ້ານໍ້າ ແລະ ເຮືອດຳນໍ້າມີຈໍານວນຫຼາຍກວ່າ 350 ລໍາ, ໃນນີ້ຫຼາຍກວ່າ 130 ລໍາເປັນເຮືອຮົບເທີງໜ້ານໍ້າ ຫຼື Major Surface Combatants.

ສ່ວນກອງທັບເຮືອຂອງສະຫະລັດໃນຊ້ວງຕົ້ນປີທີ່ຜ່ານມານີ້ ຍັງມີຈໍານວນ 293 ລໍາເທົ່ານັ້ນ. ສະນັ້ນ, ຈຶ່ງບອກໄດ້ເຕັມຄໍາວ່າຈີນເປັນປະເທດທີ່ຜະລິດເຮືອຮົບໃນລະດັບຕົ້ນໆຂອງໂລກໄດ້ແລ້ວ. ນອນຈາກນີ້, ຈີນຍັງສາມາດເພີ່ມຂິດຄວາມສາມາດໃນການຕໍ່ເຮືອທຸກປະເພດ ແລະ ທຸກລະດັບ ໃຫ້ສູງຂຶ້ນອີກໄດ້ ເພື່ອສະໜອງໃຫ້ກັບກອງທັບຈີນ ເຊິ່ງກົງກັນຂ້າມກັບສະຫະລັດທີ່ບໍ່ສາມາດເຮັດໄດ້ຕາມແຜນໃນການເພີ່ມຈໍານວນເຮືອຮົບໃຫ້ເປັນ 350-355 ລໍາໄດ້ໃນອານາຄົດທີ່ໃກ້ຈະມາຮອດນີ້.

2. ລະບົບຈະຫຼວດລອນ ແລະ ຂີປະນາວຸດທາງພາກພື້ນດີນຂອງຈີນທີ່ມີຄວາມເໜືອກວ່າ: ຈີນສາມາດພັດທະນາຂີປະນາວຸດທຸກຮູບແບບໄດ້ໂດຍບໍ່ຖືກຈຳກັດດ້ວຍສົນທິສັນຍາໃດໆເລີຍ.

ສະຫະລັດໄດ້ຄາດວ່າຈີນມີຂີປະນາວຸດແບບຍິງຈາກພື້ນ ຫຼື GLBM ແລະ GLCM (ຈະຫຼອດລອນ) ທີ່ມີໄລຍະຂອງການຍິງຢູ່ທີ່ 500-5,500 ກີໂລແມັດ ລວມກັນຫຼາຍກວ່າ 1,250 ລູກ.

ສ່ວນສະຫະລັດມີຂີປະນາວຸດຍິງຈາກພື້ນ GLBM ພຽງໜ້ອຍດຽວ ແລະ ມີໄລຍະການຍິງ 70-300 ກີໂລແມັດເທົ່ານັ້ນ. ນອກຈາກນີ້, ສະຫະລັດຍັງບໍ່ມີຂີປະນາວຸດແບບຈະຫຼອດລອນແບບ GLCM ເຂົ້າປະຈໍາການເລີຍ.

3. ການໃຊ້ລະບົບປ້ອງກັນໄພທາງອາກາດຮ່ວມກັນຢ່າງມີປະສິດທິພາບກວ່າສະຫະລັດ: ຈີນມີກອງກຳລັງລະບົບອາວຸດແບບພື້ນສູ່ອາກາດຂະໜາດໃຫຍ່ທີ່ສຸດໃສໂລກ, ມີທັງລະບົບປ້ອງກັນໄພທາງອາກາດທີ່ຜະລິດໂດຍຣັດເຊຍ ເຊັ່ນ: S-300 ແລະ S-400 ແລະ ຍັງມີລະບົບແບບທີ່ຈີນຜະລິດເອງອີກ ເຊິ່ງຖ້ານໍາລະບົບປ້ອງກັນໄພທັງໝົດນີ້ມາໃຊ້ວຽກຮ່ວມກັນ ຈະເຮັດໃຫ້ເກີດໂຄງສ້າງລະບົບປ້ອງກັນໄພທາງອາກາດທີ່ເຂັ້ມແຂງ, ຊັບຊ້ອມ ແລະ ສາມາດຊອກຫາຈຸດອ່ອນ ເພື່ອເຂົ້າໂຈມຕີໄດ້ຍາກທີ່ສຸດ.

ທັງໝົດນີ້ກໍ່ຄື 3 ຂໍ້ທີ່ສະຫະລັດໄດ້ວິເຄາະອອກມາວ່າຄືຈຸດເດັນທີ່ຈີນສາມາດພັດທະນາການທະຫານ ແລະ ນໍາທັນ ຫຼື ອາດຈະແຊງສະຫະລັດໄປແລ້ວນັ້ນເອງ ແລະ ບົດລາຍງານສະບັບນີ້ຈະຖືກນໍາໄປເປັນສ່ວນໜຶ່ງໃນການພິຈາລະນາ ເພື່ອກຳນົດນະໂຍບາຍ ແລະ ງົບປະມານໃນການພັດທະນາກອງທັບສະຫະລັດຕໍ່ໄປ.

*ສຳລັບບົດລາຍງານສະບັບນີ້ເປັນລາຍງານທີ່ກະຊວງປ້ອງກັນປະເທດສະຫະລັດຂຽນຂຶ້ນມາເອງ, ທາງເຈົ້າຂອງເພຈບໍ່ໄດ້ແຕ່ງເອງຂຶ້ນມາເດີເຈົ້າ, ເຮົາພຽງແຕ່ແປອອກມາໃຫ້ທຸກທ່ານໄດ້ອ່ານນໍາກັນເທົ່ານັ້ນ.

ດາວໂຫຼດບົດລາຍງານສະບັບເຕັມ:

https://bit.ly/3mc5Eyz

_______________

👉 ອ່ານຫົວຂໍ້ຂ່າວອື່ນໄດ້ຢູ່ດ້ານລຸ່ມ 👇