ໝຸ່ມອິນເດຍບໍ່ຈົບຮອດ ປໍ5, ແຕ່ສາມາດຕົວະເປັນໝໍໄດ້ 4 ປີ ສຸດທ້າຍຖືກຈັບຍ້ອນເມຍ

ຕໍາຫຼວດອິນເດຍຈັບຊາຍອິນເດຍອາຍຸ 23 ປີ ເຊິ່ງໃຊ້ປະຫວັດການສຶກສາປອມຕົວະເຮັດວຽກເປັນໝໍໄດ້ດົນເຖີງ 4 ປີ ແລະ ເຮັດວຽກເປັນໝໍມາແລ້ວເຖີງ 16 ໂຮງໝໍໃນຫຼາຍເມືອງຂອງອິນເດຍ.

ທ້າວ ວິລະກັນທຳ ເຕຊະ (Veeragandham Teja) ໄດ້ປອມແປງປະຫວັດທຸກຢ່າງຂອງຕົນເອງນັບຕັ້ງແຕ່ຊື່, ອາຍຸ, ໃບປະກາດ, ປະຫວັດການສຶກສາ ແລະ ປະຫວັດການເຮັດວຽກ ເພື່ອສະມັກເປັນທ່ານໝໍໃນໂຮງໝໍເອກກະຊົນຫຼາຍແຫ່ງທົ່ວປະເທດອິນເດຍ ແລະ ເຖີງຂັ້ນໄດ້ເປັນອາສາສະມັກຊ່ວຍຕໍາຫຼວດຄັດ ແລະ ຮັກສາຜູ້ຕິດເຊື້ອພະຍາດໂຄວິດ-19 ມາແລ້ວ, ແຕ່ສຸດທ້າຍລາວກໍ່ຖືກຈັບຢູ່ທີ່ເມືອງໄຮເດີລາບັດ.

ລາວຖືກຈັບໄດ້ຫຼັງຈາກເມຍຄົນທີ 2 ຂອງລາວທີ່ຫາກໍ່ແຕ່ງງານກັນໃນເດືອນກຸມພາ ໄດ້ໄປແຈ້ງຕໍາຫຼວດວ່າຖືກຜູ້ເປັນຜົວຕົວະໃຫ້ແຕ່ງງານນໍາ ເນື່ອງຈາກວ່າຜົວບໍ່ໄດ້ບອກວ່າລາວເຄີຍມີເມຍມາກ່ອນ.

ພາຍຫຼັງທີ່ຖືກຈັບ, ຕໍາຫຼວດຈົນພາກັນງຶດເມື່ອຮູ້ວ່າຊາຍຄົນດັ່ງກ່າວນີ້ໄດ້ຕົວະ ແລະ ປອມແປງເກືອບທຸກຢ່າງ ຈົນໄດ້ເຮັດວຽກເປັນທ່ານໝໍ ໂດຍໃສ່ຊື່ວ່າ ດຣ. ວາຍເອສ ເຕຊະ (Dr. YS Teja) ແລະ ໄດ້ເຮັດວຽກຢູ່ໂຮງໝໍມາແລ້ວ 16 ແຫ່ງ ທັງໆທີ່ລາວບໍ່ມີຄວາມຮູ້ທາງດ້ານການແພດເລີຍ ແລະ ຮຽນບໍ່ຈົບຮອດ ປໍ5 ຊໍ້າ.

ຈາກການສືບສວນປະຫວັດ, ເຈົ້າໜ້າທີ່ພົບວ່າ ທ້າວ ວິລະກັນທຳ ໄດ້ໜີອອກຈາກເຮືອນໃນປີ 2005 ແລະ ມາເຮັດວຽກຫາລ້ຽງຊີບໂດຍການຂາຍຂະໜົມຢູ່ລົດໄຟ ຈົນລາວບັງເອີນໄດ້ພົບກັບແພດຄົນໜຶ່ງຊື່ວ່າ ດຣ. ວາຍເອສ ປຸຣຸໂຍຕໍາ ເຣດດີ (YS Purushottam Reddy) ເຊິ່ງຊ່ວຍໃຫ້ລາວໄດ້ເຮັດວຽກເປັນຫຼັກແຫຼ່ງ, ມີໃບຂັບຂີ່, ມີບັດປະຈໍາໂຕ ຈົນສຸດທ້າຍລາວກໍ່ເລີຍຂໍໃຊ້ນາມສະກຸນ ວາຍເອສ (YS) ຂອງທ່ານໝໍຄົນດັ່ງກ່າວມາໃຊ້.

ທ້າວ ວິລະກັນທຳ ເລີ່ມປອມປະຫວັດການສຶກສາ ເຊິ່ງລວມເຖີງໃບປະກາດທີ່ຕົວະວ່າຈົບແພດສາດ ເພື່ອເອົາໄປໃຊ້ຝືກງານທີ່ວິທະຍາໄລແພດຈີເອັນ (JN Medical College) ຢູ່ທີ່ເມືອງໄຣປູ. ພາຍຫຼັງລາວໄດ້ຮຽນຮູ້ເລື່ອງການແພດແດ່ແລ້ວໜ້ອຍໜຶ່ງ, ລາວກໍ່ໄດ້ເດີນທາງຕໍ່ໄປທີ່ເມືອງບັງກະລໍແລະ ສະມັກເຮັດວຽກເປັນໝໍຢູ່ທີ່ໂຮງໝໍແຫ່ງໜຶ່ງ.

ຕໍ່ມາໝໍຂີ້ຕົວະລາຍນີ້ກໍ່ໄດ້ຍ້າຍມາທີ່ເມືອງໄຮເດີລາບັດ ແລະ ສະມັກເຂົ້າເຮັດວຽກທີ່ໂຮງໝໍສະເພາະທາງອີກຫຼາຍແຫ່ງຈົນມາຮອດເດືອນກຸມພາທີ່ຜ່ານມາ.

ຕໍາຫຼວດບອກວ່າ ນີ້ບໍ່ແມ່ນຄັ້ງທຳອິດທີ່ ທ້າວ ວິລະກັນທຳ ຖືກຈັບໄດ້ວ່າພະຍາຍາມປອມເປັນບຸກຄົນອື່ນ.

ເນື່ອງຈາກວ່າ, ລາວເຄີຍຖືກຕໍາຫຼວດຈັບຢູ່ທີ່ເມືອງບັງກະລໍໃນປີ 2016 ຂໍຫາແອບອ້າງວ່າເປັນຕໍາຫຼວດ ແລະ ນໍາເອົາລົດເຈົ້າໜ້າທີ່ອອກໄປໃຊ້ໂດຍອ້າງວ່າເປັນລູກຊາຍຕໍາຫຼວດລະດັບສູງ ແຖມຍັງເຄີຍໃຊ້ຊື່ຫຍໍ້ ວາຍເອສ ຕົວະຄົນອື່ນວ່າເປັນພີ່ນ້ອງກັບ ດຣ. ວາຍເອສ ປຸຣຸໂຍຕໍາ ເຣດດີ ມາແລ້ວອີກດ້ວຍ.

_______________

👉 ອ່ານຫົວຂໍ້ຂ່າວອື່ນໄດ້ຢູ່ດ້ານລຸ່ມ 👇