ລົດໄຟລາວ-ຈີນ ວາງລະບົບລາງແຕ່ນະຄອນຫຼວງວຽງຈັນຫາຫຼວງພະບາງສໍາເລັດແລ້ວ

ໃນວັນທີ 30 ທັນວາ 2020, ສຳນັກຂ່າວຊິນຫົວຂອງຈີນໄດ້ລາຍງານວ່າ: ການກໍ່ສ້າງທາງລົດໄຟລາວ-ຈີນ ໄດ້ສຳເລັດການວາງລະບົບລາງແຕ່ນະຄອນຫຼວງວຽງຈັນ ຫາ ຫຼວງພະບາງແລ້ວ ເຊິ່ງເປັນໄປຕາມເປົາໝາຍຂອງແຜນການທີ່ກຳນົດໄວ້.

ທ່ານ ຈູກົ໋ວຈຽງ, ປະທານບໍລິສັດ ໄຊນາ ລຽວເວ ອິນເຕີເນເຊີນນໍ ຈໍາກັດ (China Railway International) ແລະ ບໍລິສັດການລົດໄຟລາວ-ຈີນ ຈໍາກັດ (LCRC) ໄດ້ໃຫ້ສຳພາດໃນວັນທີ 28 ທັນວາ 2020 ທີ່ຜ່ານມາວ່າ: ເນື່ອງຈາກມີການລະບາດຂອງພະຍາດໂຄວິດ-19, ທາງທີມງານກໍ່ສ້າງຂອງບໍລິສັດໄດ້ກຳນົດ ແລະ ນໍາໃຊ້ມາດຕະການທີ່ເຂັ້ມງວດໃນການປ້ອງກັນການລະບາດຂອງພະຍາດ ເພື່ອໃຫ້ການກໍ່ສ້າງສາມາດດຳເນີນການໄດ້ຢ່າງສະດວກ ໂດຍບໍ່ມີຜູ້ຕິດເຊື້ອໃນລະວ່າງການກໍ່ສ້າງ ສົ່ງຜົນເຮັດໃຫ້ທີມງານວິຊະວະກອນຈີນ, ທີມງານວັດສະດຸອຸປະກອນ ແລະ ກຳມະກອນ ສາມາດສ້າງທາງລົດໄຟໄດ້ຕາມເປົ້າໝາຍໃຫ້ສຳເລັດຕາມທີ່ໄດ້ຕັ້ງເອົາໄວ້.

ທາງລົດໄຟລາວ-ຈີນ ໄດ້ດຳເນີນການວາງລະບົບລາງສໍາເລັດແລ້ວດ້ວຍໄລຍະທາງ 240 ກິໂລແມັດ ຈາກນະຄອນຫຼວງວຽງຈັນ ຫາ ຫຼວງພະບາງ ເຊິ່ງເທົ່າກັບ 57% ຂອງໄລຍະທາງທັງໝົດ ນັບຕັ້ງແຕ່ມີການວາງລະບົດລາງແຕ່ວັນທີ 27 ມີນາ 2020 ທີ່ຜ່ານມາ.

ທ່ານ ຈູ ຍັງໄດ້ກ່າວເສີມອີກວ່າ: ປະຈຸບັນ ບັນດາອຸໂມງລົດໄຟ 75 ແຫ່ງ, ຂົວ 164 ແຫ່ງ ແລະ ຄັນທາງແມ່ນຖືກກໍ່ສ້າງສຳເລັດແລ້ວ. ລົດໄຟລາວ-ຈີນ ໄລຍະທາງ 422 ກິໂລແມັດ ຈະເລີ່ມແລ່ນຈາກບໍ່ເຕັນທາງພາກເໜືອຂອງລາວໄປຫານະຄອນຫຼວງຽງຈັນດ້ວຍຄວາມໄວ 160 ກິໂລແມັດ/ຊົວໂມງ ເຊິ່ງໂຄງການດັ່ງກ່າວແມ່ນໄດ້ເລີ່ມກໍ່ສ້າງໃນເດືອນທັນວາ 2016 ໂດຍມີກຳນົດໃຫ້ສຳເລັດ ແລະ ເປີດດຳເນີນງານໃນເດືອນທັນວາ 2021.

_______________

👉 ອ່ານຫົວຂໍ້ຂ່າວອື່ນໄດ້ຢູ່ດ້ານລຸ່ມ 👇